გუშინ გაიმართა ინგლისის ასოციაციის თასის მეოთხედფინალური ეტაპის მატჩები, სადაც ორი შეხვედრა გაიმართა. ერთმანეთს ”ფრატონ პარკზე” პრემიერ ლიგის აუტსაიდერი ”პორტსმუტი” და ახლადაღზევებული ”ბირმინგემი” დაუპირისპირდნენ. მეორე შეხვედრა კი ლონდონში, ”კრევინ კოტეჯზე” გაიმართა, სადაც მასპინძელი ”ფულჰემი” ტოპ 4-ში შესვლის მსურველ ”ტოტენჰემს” დაუპირისპირდა.

ყველასდა გასაკვირად პრემიერ ლიგის აუტსაიდერმა ”პორტსმუტმა” ნახევარფინალში გააღწია და უემბლიზე თამაშის უფლება მოიპოვა. ”ბირმინგემთან” შეხვედრაში დუბლი ფრანგმა თავდამსხმელმა ფრედერიკ პიკეონმა გაიფორმა. ორივე გოლი მეორე ტაიმის ნახევარში გავიდა. ფრანგმა ჯერ დამატებაზე გაიტანა, შემდეგ კი ორი მცველი ჩამოიტოვა და შედეგად ჯო ჰარტის კარი დალაშქრა.

გოლი ”ლურჯებმაც” გაიტანეს, როდესაც ლიამ რიჯუელმა მეტოქის კარში ბურთი თავით გადაგზავნა, თუმცა რეფერიმ გოლი არ ჩათვალა, რადგან მისი აზრით, ბურთს კარის ხაზი არ გადაუკვეთავს. არბიტრის შეცდომის გასაჩივრების საშუალება ”ბირმინგემს” მიეცემა, მაგრამ ფაქტია - ასოციაციის თასის ნახევარფინალში ”პორტსმუტი” გავიდა.

მეორე შეხვედრაში ლონდონური დერბი შედგა. ორ ლონდონურ კლუბს შორის დაპირისპირება საინტერესო გამოდგა, თუმცა გატანილი გოლები არ ყოფილა. ”მამლებში” თავის გამოჩენა გუშინ ვერ შეძლო სასტარტოში მყოფმა რომან პავლიუჩენკომ, რომელმაც მასზე მიცემული ავანსები გაამართლა, გაიტანა რა 3 თამაშში 5 გოლი. მთელი თამაშის განმავლობაში საქმე არ მოჰკლებია მასპინძელთა კიპერს მარკ შვარცერს, რომელიც პრემიერ ლიგაში თებერვლის თვის საუკეთესო ფეხბურთელად დასახელდა.

16 მარტს გადათამაშება შედგება. ამჯერად ”ფულჰემი” და ”ტოტენჰემი” ერთმანეთს ”უაიტ ჰარტ ლეინზე” დაუპირისპირდებიან. შეგახსენებთ, რომ დღეს ასოციაციის თასის მეოთხედფინალური ეტაპის კიდევ ორი მატჩი შედგება. ერთმანეთში ურთიერთობას ”ჩელსი” - ”სტოკისა” და ”რედინგი” - ”ასტონ ვილას” წყვილები გაარკვევენ.

”პორტსმუტი” - ”ბირმინგემი” 2:0 (1:0)
გოლები: პიკეონი 67, 70
”პორტსმუტი”: ჯეიმსი, ჰრეიდარსონი, ფინანი, ბენ ჰაიმი, ბელჰაჯი, ო’ჰარა, ბრაუნი, უტაკა, უილსონი, ბიკეონი, უებერი (დიოპი 85)
”ბირმინგემი”: ჰარტი, კარი, რიჯუელი, ჯონსონი, დანი, ბოიერი, ლარსონი (გარდნერი 84), ფერგიუსონი, ფაჰი (ფილიპსი 72), ჯერომი, მაკფადენი (ბენიტესი 75)
გაფრთხილება: ბრაუნი - ფერგიუსონი

”ფულჰემი” - ”ტოტენჰემი” 0:0 (0:0)
”ფულჰემი”: შვარცერი, ჰანგელანდი, ბეირდი, შოური, ჰიუზი, გერა, დაფი, ეტუჰუ, გრინინგი, დევისი (ელმი 73), ზამორა
”ტოტენჰემი”: გომესი, ბეილი, ბასონგი, დოუსონი, ჩორლუკა, ასუ-ეკოტო, პალასიოსი, მოდრიჩი, კრანჩარი, პავლიუჩენკო (დეფო 81), კრაუჩი
გაფრთხილება: ეტუჰუ