"ბლექბერნმა" სეზონის ბოლომდე არენდით "შტუტგარტისა" და თურქეთის ნაკრების პლეიმეიკერი ილდირაი ბაშტურკი აიყვანა.

ბასტურკს ბუნდესლიგაში თამაშის 14 წლიანი გამოცდილება აქვს. ნაკრების შემადგენლობაში მან 49 მატჩი ჩაატარა. 2002 წელს მაშინდელ კლუბთან ლევერკუზენის "ბაიერთან" ერთად ბაშტურკი ჩემპიონთა ლიგის ფინალში გავიდა, სადაც მადრიდის "რეალთან" 2:1 დამარცხდა. ამავე წელს მისმა ნაკრებმა მსოფლიო ჩემპიონატზე მესამე ადგილი დაიკავა კორეასა და იაპონიაში.

ბაშტურკს შეუძლია მარტომ შექმნას მომენტები და კარგი პასებით მოამარაგოს თანაგუნდელები. "ბაიერში" ჩატარებული 3 სეზონის შემდეგ ის ბერლინის "ჰერტაში" გადავიდა. 2007 წლის ივლისში თურქი "შტუტგარტში" ჩაირიცხა, სადაც 31 მატჩი ჩაატარა.

მიმდინარე სეზონში ბაშტურკს არასტაბილური სათამაშო პრაქტიკა აქვს, რის გამოც "ბლექბერნის" წინადადებას და ინგლისში 6 თვე თამაშს მაშინვე დათანხმდა. ნახევარმცველი "ბლექბერნის" თავკაცის სემ ელერდაისის პირველი შენაძენი გახდა იანვარში.

ბაშტურკის დებიუტი დღეს "უიგანის" წინააღმდეგ ვერ შედგება. სავარაუდოდ, ის "ბლექბერნის" შემადგენლობაში პირველ მატჩს 30 იანვარს ჩაატარებს, როცა "როვერსი" ლონდონში "ვესტ ჰემ იუნაიტედს" ეწვევა.