როგორც BBC იტყობინება, ინციდენტში, რომელიც გუშინ "ბრიტანია სტეიდიუმზე" მოხდა, სტუმართა გუნდის - "ბლექბერნის" გულშემატკივარი დაიღუპა.

შეგახსენებთ, რომ გუშინ "სტოკმა" საკმაოდ მოულოდნელი გამარჯვება მოიპოვა "ბლექბერნზე", ანგარიშით 3:0. ამ მატჩში "როვერსის" დასახმარებლად სტუმართა 1 300 გულშემატკივარი მოვიდა. მატჩის მსვლელობის დროს სტუმართა ტრიბუნაზე 30 წლის მამაკაცს თავში ცარიელი ლუდის ბოთლი მოხვდა. მან გონება დაკარგა და სასწრაფოდ იქნა გადაყვანილი საავადმყოფოში, თუმცა ექიმები უძლურნი აღმოჩნდნენ და სამწუხაროდ გულშემატკივრის სიცოცხლის გადარჩენა ვერ მოახერხეს.

პოლიციამ უკვე დააკავა 25 წლის პრესტონელი მამაკაცი, რომელიც ინციდენტშია ეჭვმიტანილი. ჯერჯერობით ოფიციალური განცხადება არც ერთ კლუბს არ გაუკეთებია, თუმცა როგორც ცნობილი გახდა, "ბლექბერნის" გულშემატკივრის სიკვდილში ბრალი არც ერთ "სტოკის" გულშემატკივარს არ მიუძღვის.