"მანჩესტერ იუნაიტედის" თავკაცმა სერ ალექს ფერგიუსონმა შეაქო თავისი შეგირდების მოთმინება, რომელიც გუნდმა საშინაო მატჩში "პორტსმუტის" წინააღმდეგ გამოავლინა და განაცხადა, რომ მოპოვებული გამარჯვება "მანჩესტერს" ფსიქოლოგიურ უპირატესობას გაუმყარებს "ჩელსისთან" და "არსენალთან", რომლებიც ხვალ ერთმანეთში გაარკვევენ ურთიერთობას.

შეგახსენებთ, რომ დღეს "მანჩესტერ იუნაიტედმა" საკუთარ "ოლდ ტრაფორდზე" უიმედო აუტსაიდერ "პორტსმუტს" უმასპინძა და გამანადგურებელი ანგარიშით 5:0 დაამარცხა. აღსანიშნავია, რომ მატჩი მასპინძლებისათვის დამამშვიდებლად არ დაიწყო, რადგან სტუმრები თავს კარგად იცავდნენ და ამავე დროს კონტრ-შეტევებზეც კარგად თამაშობდნენ.

თუმცა პირველი ტაიმის დასრულებამდე ხუთი წუთით ადრე ანგარიში გაიხსნა. დარენ ფლეტჩერის ჩამოწოდებულს ზუსტი თავურით უმასპინძლა უეინ რუნიმ. ტაიმის კომპენსირებულ წუთებში კი ლუის ნანის დარტყმული ფეხზე მოხვდა ენტონი ვან დენ ბორეს და დევიდ ჯეიმსის კარის ბადეში გაეხვა. შესვენებაზე გუნდები ანგარიშით 2:0 გავიდნენ.

მეორე ტაიმში კი სრული უპირატესობა მასპინძელთა მხარეს იყო, რის გამოც მათ მეტოქის კარი კიდევ სამჯერ აიღეს. მესამე გოლი მაიკლ კერიკის ანგარიშზეა, რომლის შორეული დარტყმულიც რიჩარდ ჰიუზს მოხვდა და ამის შედეგად გავიდა. შემდეგ გაიტანა დიმიტარ ბერბატოვმა. ყველაფერს წერტილი სტუმართა მცველმა მარკ უილსონმა დაუსვა, რომელმაც პატრის ევრას ჩამოწოდებულის მოგერიება სცადა, თუმცა საკუთარ კარში მეხუთე გოლი გაიტანა.

"პირველი გოლის გასატანად საკმაო დრო დაგვჭირდა, მაგრამ ჩვენ საკმაოდ ბევრი მოვიცადეთ, დიდხანს ვფლობდით ბურთს და შედეგად გავიტანეთ კიდეც. მეტოქე ცდილობდა ჩვენი განზრახვები ჩაეშალა, მაგრამ ჩვენ შესვენებამდე ორბურთიანი უპირატესობის მოპოვება მოვახერხეთ, რომელმაც ფსიქოლოგიურად მეტოქეზე იმოქმედა. ამ რეზულტატით სერიოზული საფრთხე ექმნებათ ჩვენს ოპონენტებს პრემიერ ლიგის მოგებისათვის, რადგან ხვალ მათ აუცილებლად გამარჯვება დასჭირდებათ" - აცხადებს ფერგიუსონი MUTV-თან ინტერვიუში.