გუშინ "არტემიო ფრანკისა" და "ემირეიტს სტეიდიუმის" ტრიბუნებზე განსაკუთრებული მღელვარება იყო, ისინი ჩემპიონთა ლიგის 1/8 ფინალის განმეორებით მატჩებს მასპინძლობდნენ. ფლორენციაში "ფიორენტინა" "ბაიერნს" ხვდებოდა და მიუნხენში წაგების მიუხედავად შემდეგ ეტაპზე გასვლის არცთუ ცუდ შანსებს ინარჩუნებდა. საბრძოლო შემადგენლობით მოასპარეზე "რეკორდმაისტერის" ერთადერთი ამოცანა კი არწაგება, ან სასურველი ანგარიშით მარცხი გახლდათ, გერმანელებმაც საბოლოოდ სწორედ ამ უკანასკნელის შესრულება შეძლეს.

მატჩი იტალიელთა შეტევებით დაიწყო და 28–ე წუთზე ვან ბუიტენის შეცდომის შემდეგ ვარგასმა მასპინძლები დააწინაურა. "ბაიერნმა" მყისვე შეტევების წამოწყება ვერ შეძლო, თუმცა ტაიმის ბოლოს რობენს საგოლე შანსი მაინც მიეცა, მაგრამ ხელსაყრელი მდგომარეობიდან ბურთი ხარიხას გადააცილა.

მეორე ნახევრის დაწყებიდან 9 წუთში იოვეტიჩმა გერმანელებს კიდევ ერთხელ გადაავლო ცივი წყალი და საკუთარი გუნდი 2:0 დააწინაურა, ეს გოლი "ბაიერნისთვის" ბევრს არაფერს წყვეტდა, საპასუხო ბურთის გატანა მის აქამდეც აუცილებელი იყო, უბრალოდ თუ 1:1 შემდეგი ეტაპის საგზურს აძლევდა, ახლა მხოლოდ გერმანული მატჩის ანგარიშის გამეორებას შეძლებდა და დამატებითი დრო დაინიშნებოდა. ვან ბომელის მიერ გატანილმა გოლმა თითქოს მოვლენების ამგვარი განვითარებისკენ მიგვანიშნა, მაგრამ ასე არ ფიქრობა იოვეტიჩი, მან საკუთარი გუნდი კიდევ ერთხელ დააწინაურა, და არტემიო ფრანკიც ზეიმმა მოიცვა, რომელიც... მხოლოდ ერთ წუთს გაგრძელდა, რობენმა ცენტრიდან გათამაშებული ბურთი მიიღო, მეკარეს გახედა და ულამაზესი შორეული დატყმით ანგარიში 3:2 გახადა. დარჩენილ ნახევარ საათში ორივე გუნდი ბევრს ეცადა, განსაკუთრებით კარგად ეს ამჯერად უკვე მიუნხენელებს გამოსდიოდათ, რობენმა კიდევ რამდენიმე ხელსაყრელი მომენტი ვერ გამოიყენა, "ფიორემ" კი საბოლოო შტურმის მოწყობა ვერაფრით მოახერხა და მოგების მიუხედავად მეოთხედფინალისკენ მიმავალი გზა "ბაიერნს" დაუთმო.

ანალოგიური მდგომარეობა გახლდათ მატჩის წინ ლონდონშიც; სადაც "არსენალი" პორტუგალიაში განცდილი მარცხის გაბათილებას ცდილობდა, თუმცა ამისთვის საკმაოდ კარგად დაბალანსებული "პორტუ" ტრავმირებული კაპიტნის, სესკ ფაბრეგასის გარეშე უნდა დაემარცხებინა. ვენგერმა, როგორც ყოველთვის, თამაში შეტევებზე ააგო და არც შემცდარა. თავდასხმის მისეულა ვარიანტმა კი კიდევ ერთხელ გაამართლა, ბენდტნერმა ჰეთ–თრიკი შეასრულა და გუნდის წარმატებაში ლომის წვლილი დაიდო. ეს ერთ–ერთი იმ მატჩთაგანი გახლდათ, რომელშიც "მეთოფეებს" ყველაფერი გამოსდიოდათ, მათ მეტოქეს კი – არაფერი. საბოლოოდ, ტაბლოზეც შესაბამისი შედეგი დაფიქსირდა, 5:0 "არსენალის" სასარგებლოდ და "დიდი ფრანგის" კრებული მთავარი ევროპული ჯილდოსთვის ბრძოლას აგრძელებს. თუ ამ ფაქტს პრემიერლიგის ლიდერთა სამეულის სრულფასოვან წევრობასაც დავამატებთ, მოგვიწევს იმის აღიარება, რომ ამ შემადგენლობით "არსენალისგან" ამას არავინ ელოდა, კიდევ ერთხელ ბრავო ვენგერს!

ორივე გუშინდელი მატჩის ვიდეომასალა fanebi.com–მა live რეჟიმში შემოგთავაზათ http://fanebi.com/article/videos/matchgoal/9429/

ეს კი ორივე შეხვედრის სრული ჩანაწერი ჩვენს ფორუმზე: http://forum.fanebi.com/index.php?showtopic=7371