გელზენკირხენელები ტურის ცენტრალურ შეხვედრაში “ბაიერნს” სტუმრად ეთამაშებოდნენ და 21-ე წუთზე ალტინტოპის მიერ გატანილი ერთადერთი გოლის წყალობით, მოულოდნელ გამარჯვებას მიაღწიეს. ლევან კობიაშვილმა შეხვედრა სრულად ჩაატარა. ქართველმა ფეხბურთელმა ერთხელ დაარტყა ზუსტად კარში, მაგრამ მეკარეს ვერ აჯობა. ასევე, ერთხელ დაარღვია თამაშის წესი, ამდენჯერვე ითამაშა კარგად ართმევაზე და გააკეთა 34 გადაცემა, რომელთაგან 24 ზუსტი გამოდგა. ლევან ყენია გუნდის განაცხადში კი მოხვდა, მაგრამ შეხვედრაში ჩართვის საშუალება არ მისცემია. მიუხედავად მოგებისა, “შალკემ” ევროპის ლიგაზე გამსვლელ მეხუთე ადგილთან სხვაობა მაინც ვერ შეამცირა და ჩემპიონატის დასრულებამდე ხუთი ტურით ადრე, ამდენივე ქულა აშორებს სანუკვარი ადგილის დაკავებამდე.
სენსაციური გამარჯვება მოიპოვა ალექსანდრე იაშვილის “კარლსრუემ”, რომელმაც ცხრილის შუაში მყოფი ლევერკუზენის “ბაიერი” გასვლაზე დაამარცხა და ბოლო ათ მატჩში პირველად მოახერხა სამი ქულის მოპოვება. შეხვედრის ბედი 72-ე წუთზე ლანგკამპის მიერ გატანილმა ერთადერთმა გოლმა გადაწყვიტა. ქართველი ფეხბურთელი თამაშში გოლამდე ხუთი წუთით ადრე ჩაერთო და დარჩენილი დროის განმავლობაში, ერთხელ დაჯარიმდა, ამდენჯერვე აიძულა მეტოქე წესები დაერღვია, გააკეთა ცხრა გადაცემა, რომელთაგან ექვსი ზუსტი გამოდგა. 29 თამაშის შემდეგ, “კარლსრუე” კვლავ ბოლო ადგილზე იმყოფება, მაგრამ მე-15 ადგილთან უკვე მხოლოდ ორი ქულა აშორებს. ისიც უნდა აღინიშნოს, რომ იაშვილის გუნდის კონკურენტთაგან სამს, თითო თამაში რეზერვში აქვთ.

(0)

ამობეჭდვა

აცნობე მეგობარს

მაღლა

---