ბათუმის “დინამომ” “ცხინვალს” სძლია და გალიდერდა
დღეს, მიხეილ მესხის სახელობის სტადიონის სათადარიგო მოედანზე უმაღლესი ლიგის 21-ე ტურის შეხვედრაში “ცხინვალმა” ბათუმის “დინამო” მიიღო და მინიმალური ანგარიშით დამარცხდა. მიუხედავად რთული მეტეოროლოგიური პირობებისა, შეხვედრა საკმაოდ დაძაბული და საინტერესო გამოდგდა.
მატჩი სტუმრებმა აქტიურად დაიწყეს და მე-13 წუთზე ანგარიშის გახსნის შანსიც გაუშვეს ხელიდან. დიასამიძის პასის შემდეგ “ცხინვალის” კარის დალაშქვარს ქავთარაძე ცდილობდა, თუმცა მისი დარტყმული კარს მცირე მანძლით ასცდა.
პირველი ნახევარი ბათუმელთა ტერიტორიული უპირატესობით წარიმართა და მატჩიც სწორედ სტუმრების კარნახით მიმდინარეობდა, რაც 43-ე წუთზე სავსებით ლოგიკური გოლით დასრულდა. მარჯვენა ფლანგიდან მოწოდებულ კუთხურს შორეულ ძელთან უმეთვალყურეოდ დარჩენილი ვაჟა ქორიძე გამოეხმაურა და ზუსტადაც დაარტყა – 0:1.
შესვენების შედმეგ ბათუმელებმა აქცენტი საკუთარი კარის უსაფრთხოებაზე და მოპოვებული ანგარიშის შენარჩუნებაზე გააკეთეს. კაჭარავამ კი შეტევის გაძლიერება სცადა და ტაიმის პირველივე წუთებიდან ინტერტული ცაცკრიალაშვილის ნაცვლად მოედანზე გამოჯანმრთელებული ივანიშვილი შეუშვა. ფორვარდი თამაშში საკმაოდ აქტიურად ჩაერთო და გათანაბრების შანსი ორჯერ ჰქონდა, თუმცა ორივე შემთხვევაში ალავიძემ დამაჯერებლად ითამაშა. გატანის შანსი ბათუმელებსაც ჰქონდათ, როდესაც 67-ე წუთზე მეტოქის საჯარიმოში მარჯვენა ფლანგიდან შეჭრილმა ქავთარაძემ დაარტყა, მაგრამ ნადირაძის კარს მცირე მანძილით ააცილა.
საბოლოოდ, “დინამომ” შეხვედრა გამარჯვებამდე განსაკუთრებული პრობლემების გარეშე მიიყვანა და სანაკრებო პაუზის წინ ლიდერ “დინამო თბილისს” გაუთანაბრდა.
ცხინვალი 0-1 დინამო ბათუმი
გოლი: ქორიძე 43′
ცხინვალი: ნადირაძე, თარხნიშვილი, ცერცვაძე, მახარობლიძე, ქარდავა, შინდაგორიძე, ცაცკრიალაშვილი (ივანიშვილი 46′), ბაჩიაშვილი (ჯიშკარიანი 84′), კილასონია, კაჭკაჭიშვილი, ლექვთაძე
მთავარი მწვრთნელი: კახა კაჭარავა
დინამო ბათუმი: ალავიძე, ქორიძე, ტეტუნაშვილი, მახარაძე, სუხიაშვილი, შონია, ვარშანიძე, ქავთარაძე, დიასამიძე (ჭკუასელი 83′), ბერიაშვილი (თევდორაძე 90′), ტატანაშვილი (აბუსელიძე 77′
მთავარი მწვრთნელი: ლევან ხომერიკი
მარიამ ნიშნიანიძის ფოტოები
