FBI-მ ფიფაში კორუფციული სქემა გაშიფრა — დაკავებულია 14 პირი
ფიფას საპრეზიდენტო არჩევნებამდე ორი დღით ადრე შვეიცარიის ქალაქ ციურიხში ორგანიზაციის რამდენიმე მაღალჩინოსანი კორუფციის ბრალდებით დააკავეს. გავრცელებული ინფორმაციით, მათ შორის არიან მსოფლიო ფეხბურთის მმარველი ორგანოს ვიცეპრეზიდენტი ჯეფრი ვები და ბრაზილიის ფეხბურთის კონფედერაციის ყოფილი პრეზიდენტი ჟოზე მარია მარინი. სულ დაკავებულია 14 პირი. აქედან ოთხი პიროვნება უკვე დამნაშავედ ცნეს.
გამოძიებას ამერიკის შეერთებული შტატების ფედერალური საგამოძიებო ბიურო ხელმძღვანელობს. სწორედ მათ მიერ მიწოდებული ინფორმაციის საფუძველზე მოახდინა შვეიცარიის პოლიციამ ციურიხის ერთ-ერთ სასტუმროში ფიფას მაღალჩინოსნების დაკავება. დაკავებულების ექსტრადირება აშშ-ში მოხდება.
დაკავებულები რეკეტში, თაღლითობაში, ქრთამის აღებასა და ფულის გათეთრებაში არიან ეჭვმიტანილნი. საუბარია 10 მილიარდ აშშ დოლარზე მეტ თანხაზე. აშშ-ის გენპროკურორმა ლორეტი ლინჩმა წარმოადგინა კორუფციული სქემა, რომლის მიხედვითაც, ფიფას მაღალჩინოსნები ქრთამის მიღების სანაცვლოდ ერთ-ერთ მარკეტინგულ კომპანიას ემხრობოდნენ, ეს უკანასკნელი კი თავის მხრივ სამაუწყებლო კომპანიებსა და კორპორატიულ სპონსორებს სატელევიზიო და მარკეტინგულ უფლებებს გადასცემდა. ლინჩის თქმით, გამოძიება ჯერ არ დასრულებულა.
“ფიფას მაღალჩინოსნებმა ზიანი მიაყენეს აშშ-ის საფინანსო სისტემას, დაარღვიეს აშშ-ის კანონები. მათ 2010 წლის მსოფლიოს ჩემპიონატის მასპინძელ ქვეყნად სამხრეთ აფრიკის არჩევისთვის ქრთამი მიიღეს”, – ციტირებს BBC ლინჩის სიტყვებს.
შეგახსენებთ, რომ 29 მაისს ფიფას საპრეზიდენტო არჩევნები გაიმართება. პრეზიდენტის პოსტისთვის ერთმანეთს მოქმედი პრეზიდენტი იოზეფ ბლატერი და იორდანიის პრინცი ალი ბინ ალ ჰუსეინი შეეცილებიან. როგორც ცნობილია, საქართველო ალი ბინ ალ ჰუსეინს უჭერს მხარს.
