გრიგალავას აკრძალული პრეპარატი აღმოუჩინეს და დამოუკიდებელ ექსპერტიზაზე უარს ეუბნებიან
გია გრიგალავას სისხლში აღმოჩენილი აკრძალული პრეპარატის გამო “ანჟი” 25 წლის ფეხბურთელთან კონტრაქტის გაწყვეტას აპირებს.
ფეხბურთელთან დაახლოებულმა პირმა აღნიშნულ საკითხზე რუსულ პრესასთან ისაუბრა: “გიამ ყველა მოთამაშესთან ერთად იანვარში ჩააბარა ანალიზები და ტესტმა აკრძალული პრეპარატები არ დააფიქსირა. მაგრამ, რამდენიმე დღის წინ კლუბმა გრიგალავას და კიდევ რამდეინმე მოთამაშეს დამატებითი ანალიზების გავლა სთხოვა. ტესტმა დადებითი რეზულტატი აჩვენა, თუმცა შესაბამისი ცნობა მოთამაშეს არ მისცეს და მიანიშნეს, რომ მან კლუბის გამოცვლაზე უნდა იფიქროს. აღსანიშნავია, რომ გიას საკუთარი ხარჯებით მოსკოვის ერთ-ერთ კლინიკაში დამოუკიდებელი ექსპერტიზის ჩატარება სურდა, რაზეც კლუბიდან უარი მიიღო.”
გრიგალავა “ანჟის” ერთ-ერთი მაღალანზაღაურებადი ფეხბურთელია და კონტრაქტით მახაჩკალურ კლუბს კიდევ წელიწადნახევრით ეკუთვნის. რუსეთის პირველ ლიგაში გავარდნილმა გუნდმა ქართველი მცველი ტრანასფერზეც დააყენა, თუმცა მისი გასხვისება ვერ შეძლო და როგორც ჩანს ახლა ამის გაკეთებას არც თუ ისე სუფთა ხერხებით აპირებს. აქვე შეგახსენებთ, რომ გრიგალვას მიმართ ინტერესს პრემიერლიგის ბინადარი პერმის “ამკარი” იჩენს.
