ჰენდერსონმა ბალოტელის ქმედება შეაფასა
უეფას ევროპის ლიგის მეთექვსმეტედფინალურ ეტაპზე “ლივერპულმა” “ბეშიქთაში” მარიო ბალოტელის მიერ გატანილი თერთმეტმეტრიანის წყალობით, ანგარიშით 1:0 დაამარცხა. აღსანიშნავია, რომ პენალტის დარტყმას თავდაპირველად ჯორდან ჰენდერსონი აპირებდა, რომელსაც სტივენ ჯერარდის არყოფნაში კაპიტნის სამკლავური ჰქონდა მორგებული, თუმცა იტალიელმა თავდამსხმელმა ინგლისელ ნახევარმცველს ბურთი გამოართვა და თერთმეტმეტრიანის შესრულება საკუთარ თავზე აიღო. ბალოტელის ქმედებამ თანაგუნდელების არაერთგვაროვანი რეაქცია გამოიწვია. დანიელ სტარიჯი და ჰენდერსონი მარიოს საქციელით უკმაყოფილონი დარჩნენ, ჯერარდმა კი იტალიელი ფეხბურთელი მატჩის შემდეგ გააკრიტიკა.
ჰენდერსონმა შეხვედრის შემდეგ სიტუაციის განმუხტვა სცადა.
“პენალტის დარტყმა მე მინდოდა. მარიოს მანამდეც ბევრი თერთმეტმეტრიანი ჰქონდა გატანილი და საკუთარ თავში დაჯერებული იყო. ყველას სურს პენალტის დარტყმა. ბალოტელის მჯეროდა, ის შტატიანი პენალტისტია და მან ახლაც დაამტკიცა, რომ თერთმეტმეტრიანის დარტყმა შეუძლია”, – ციტირებს ჰენდერსონის სიტყვებს “დეილი მეილი”.
