ნასრი: „იაია ტურე აფრიკელი რომ არ იყოს, საუკეთესოდ დაასახელებდნენ“

„მანჩესტერ სიტის“ ნახევარმცველმა სამირ ნასრიმ განაცხადა, რომ იაია ტურეს სათანადოდ ვერ აფასებენ და ეს მხოლოდ იმიტომ ხდება, რომ ის აფრიკელი ფეხბურთელია.

„იაია ტურე აფრიკელი რომ არ იყოს, მას მსოფლიოს მასშტაბით საუკეთესო ნახევარმცველად დაასახელებდნენ. მოედანზე მას ყველაფრის გაკეთება შეუძლია – გატანა, დაცვა, შეტევა. ბურთთან ერთად უფრო ძლიერია. ტურეს თამაშით შეიძლება მხოლოდ აღფრთოვანდე, ის დიდებული ფეხბურთელია.

შესაძლოა, მე ცოტაოდენ არაობიექტური ვარ, ის ხომ ჩემი მეგობარია?! თუმცა, ჩემთვის იაია ტურე მსოფლიოს მასშტაბით საუკეთესო ნახევარმცველთა სამეულში შედის. ერთადერთი რამ მოქმედებს მის საწინააღმდეგოდ – ის კოტ დივუარელია. ბრაზილიელი ან არგენტინელი რომ იყოს, ყველა მასზე ილაპარაკებდა.

ბრაზილიელებსა და არგენტინელებზე ცუდის თქმა არ მინდა, მაგრამ მათში 40-50 მილიონს იხდიან და მხოლოდ იმიტომ, რომ ისინი დასახელებული ქვეყნების მოქალაქეები არიან. დამისახელეთ თუნდაც ერთი საყრდენი, რომელიც ტურეს მსგავსად, შეტევებშიც ერთვება და სეზონში 16-17 გოლს იტანს“, – ნასრის სიტყვები ბრიტანულმა „ტელეგრაფმა“ გამოაქვეყნა.

ბექა დოგრაშვილი