“რეალმა” “ბაიერნს” დამატებით დროში მოუგო (ვიდეო)
დრამატულად განვითარდა უეფას ჩემპიონთა ლიგის მეოთხედფინალურ ეტაპზე მადრიდის “რეალსა” და მიუნხენის “ბაიერნს” შორის გამართული საპასუხო შეხვედრა. მატჩი მაღალ ტემპში დაიწყო და გოლის გატანის შანსი არაერთხელ მიეცა ორივე გუნდს, მაგრამ პირველი ტაიმი უგოლოდ მიილია.
შეხვედრის 51-ე წუთზე კაზემირომ საკუთარ საჯარიმო მოედანზე არიენ რობენი წააქცია და მთავარმა არბიტრმა ვიქტორ კაშაიმ თერთმეტმეტრიანის ნიშნულისკენ მიუთითა. პენალტი ზუსტად შეასრულა რობერტ ლევანდოვსკიმ. 76-ე წუთზე კრიშტიანუ რონალდუმ თავური დარტყმით წონასწორობა აღადგინა, მაგრამ ერთი წუთის შემდეგ სერხიო რამოსმა ბურთი საკუთარ კარში ჩაჭრა და ორი მატჩის ჯამში ანგარიში გათანაბრდა. 84-ე წუთზე არტურო ვიდალმა მეორე ყვითელი ბარათი მიიღო და გერმანელები მოედანზე რიცხობრივ უმცირესობაში დარჩნენ. მატჩის ძირითადი დრო “ბაიერნმა” 2:1 მოიგო, რის შემდეგაც დამატებითი ტაიმები დაინიშნა. 104-ე წუთზე სერხიო რამოსის მიერ მოწოდებული ბურთის შემდეგ კრიშტიანუ რონალდუ მეტოქის საჯარიმოში მეურვის გარეშე აღმოჩნდა და მანუელ ნოიერის კარში მესამე გოლიც გაიტანა, თუმცა აღსანიშნავია, რომ ამ ეპიზოდში თამაშგარე მდგომარეობა იყო, რაც მსაჯებმა ვერ შენიშნეს. 109-ე წუთზე მარსელომ გაარღვია გერმანელთა დაცვის ხაზი, მეკარესთან პირისპირაც აღმოჩნდა და გოლის გატანაც შეეძლო, მაგრამ ბრაზილიელმა რონალდუსთვის პასის გაკეთება ამჯობინა და “რეალის” პორტუგალიელმა ლიდერმა ჰეთთრიკი შეასრულა. სამ წუთში თავისი გოლი შეცვლაზე შემოსულმა მარკო ასენსიომაც გაიტანა და საბოლოო ანგარიში დააფიქსირა – 4:2. “რეალი” ნახევარფინალში გავიდა.
ჩემპიონთა ლიგა
მეოთხედფინალი (II მატჩი)
“რეალი” — “ბაიერნი” 4:2 (ძირითადი დრო 1:2)
გოლები: რონალდუ 76′, 104′, 109′, ასენსიო 112′ — ლევანდოვსკი 53′ (პენ), სერხიო რამოსი 77′ (ა.გ.).
გაძევება: ვიდალი 84′.
