“ზესტაფონი” უმაღლესი ლიგიდან მოიხსნა

საქართველოს ფეხბურთის ფედერაციაში დღეს სადისციპლინო კომიტეტის სხდომა გაიმართა, სადაც საფეხბურტო კლუბ “ზესტაფონის” საკითხი განიხილა.

შეგახსენებთ, რომ ფინანსური პრობლემების გამო იმერული კლუბი გუშინ გორის “დილასთან” გასამართ საშინაო შეხვედრაზე არ გამოცხადდა, რის გამოც შეხვედრა ჩაიშალა. 

სადისციპლინო კომიტეტის გადაწყვეტილებით „ზესტაფონს“ ჩაეთვალა წაგება 0:3 გორის „დილასთან“ მატჩში გამოუცხადებლობის გამო. დაეკისრა ფულადი ჯარიმა 5 ათასი ლარი და მოიხსნა შეჯიბრებიდან.

ასევე, საქართველოს 2014-15 წწ. ეროვნული ჩემპიონატის დებულების 4.34 პუნქტის თანახმად, ეროვნული ჩემპიონატის ყველა დარჩენილ მატჩში „ზესტაფონს“ ჩაეთვალა წაგება, ამავე პუნქტის თანახმად – თუ გუნდს მატჩების ნახევარის ან მეტის ჩატარების შემთხვევაში, გუნდს ყველა დარჩენილ თამაშში ჩაეთვლება წაგება 0:3 და ასეთი გუნდი დაგროვილი ქულებით დარჩება გათამაშების ცხრილში.

სადისციპლინო კომიტეტმა დისციპლინარული სასჯელი დააკისრა კლუბის დირექტორსაც. სფფ-ის სადისციპლინო კოდექსის 130-ე, გარდამავალი დებულებების მუხლისა და 55-ე, სფფ-ის სადისციპლინო კომიტეტის ზოგადი იურისდიქციის მუხლის თანახმად, მიხეილ ხუციშვილს მიეცა ერთწლიანი სანქცირებადი ვადა. ამ ერთი წლის განმავლობაში, თუ კვლავ გამოიკვეთება მისი ბრალეულობა რაიმე საკითხში, მას მიეცემა დისკვალიფიკაცია და აეკრძალება საფეხბურთო საქმიანობა.

აღნიშნული გადაწყვეტილების გასაჩივრება “ზესტაფონს” 7 დღის განმავლობაში შეუძლია.