19-წლამდელები: პირველ კალათაში, მეოთხე რეიტინგში – წილისყრის მოლოდინში
ხვალ, 28 ნოემბერს, ნიონში, უეფას 2013/14 წლების სეზონის 17 და 19-წლამდე ნაკრებების ელიტრაუნდის წილისყრა გაიმართება. წილისყრაზე დასასწრებად შვეიცარიაში უკვე გაემგზავრნენ საქართველოს ფეხბურთის ფედერაციის პრეზიდენტი და გენერალური მდივანი.
„ძალიან დიდი სურვილი გვაქვს და ყველაფერს გავაკეთებთ, რომ 19-წლამდელთა ელიტრაუნდი თბილისში წამოვიღოთ. ეს მონაწილე ქვეყნებს შორის ურთიერთშეთანხმებასა და მოლაპარაკებებზეა დამოკიდებული. თუმცა, კიდევ ერთხელ ვიმეორებ, ჩვენ ძალას არ დავიშურებთ, რომ ჩვენმა ბიჭებმა სახლში ითამაშონ და კვლავ გაახარონ ქართველი გულშემატკივარი“ – განაცხადა გამგზავრების წინ სფფ-ის პრეზიდენტმა – ზვიად სიჭინავამ.
19-წლამდე ასაკში საქმე მართლაც საამაყოდ გვაქვს. ვასილ მაისურაძის ნაკრები პირველ კალათაშია განთესილი და საკვალიფიკაციო ეტაპის შემდეგ, ამ ასაკში, ნაჩვენები შედეგებით ევროპულ რეიტინგში მეოთხეა.
19-წლამდე ასაკში, ყველაზე შედეგიანი და წარმატებული ქვეყანა ესპანეთია, რომელიც 6-გზის ევროპის ჩემპიონია. მოქმედი ჩემპიონი კი, სერბეთი გახლავთ, რომელმაც ივლისში, ლიტვაში გამართული ევროპის ჩემპიონატის ფინალში საფრანგეთი დაამარცხა.
რაც შეეხება წილისყრას, საკვალიფიკაციო ეტაპიდან გასული 28 გუნდი 4 კალათაშია გადანაწილებული, საიდანაც, ელიტრაუნდისთვის შეიქმნება 7 ჯგუფი და საკვალიფიკაციო ეტაპის მეტოქეები გუნდებს აღარ შეხვდებიან. ანუ, ჩვენს შემთხვევაში, უელსის ნაკრები მეტოქედ ვეღარ გვეყოლება. თითოეული ჯგუფის მასპინძელი ქვეყანა წილისყრის შემდეგ გაირკვევა, როცა ჯგუფის მონაწილე ქვეყნების წარმომადგენლები სამუშაო შეხვედრაზე დასხდებიან.
19-წლამდელთა მომავალი ევროპის ჩემპიონატი კი, 2014 წლის 19-31 ივლისს, უნგრეთში გაიმართება. შესაბამისად, უნგრეთის ნაკრები იქნება მერვე გუნდი, რომელიც ელიტრაუნდიდან გასულ შვიდ გუნდს შეუერთდება.
28 ნოემბრის წილისყრას საქართველოში ყველა მოუთმენლად ელოდება. რა თქმა უნდა, განსაკუთრებული მოლოდინი აქვთ საქართველოს 19-წლამდე ნაკრების ფეხბურთელებს.
ოთარ კაკაბაძე: „უპირველესად, ძალიან გახარებული და ამაყი ვარ, პირველ კალათაში რომ მოვხვდით და ყველას ვულოცავ ამ წარმატებას. რეიტინგშიც ძალიან ღირსეული ადგილი გვიკავია. თუმცა, ამ უპირატესობას გამოყენება სჭირდება და ჩვენ ყველაფერს გავაკეთებთ იმისთვის, რომ ჯგუფში პირველ ადგილზე გავიდეთ და ჩემპიონატის ფინალურ ეტაპზე მოვხვდეთ. პირადად მე, ჯგუფში არ ვისურვებდი გერმანიის ნაკრებს, მაგრამ ბიჭებს უკვე იმხელა გამოცდილება დაგვიგროვდა, რომ გერმანიასაც არ შევუშინდებით და მათთანაც შევეცდებით ჩვენი ძალის დამტკიცებას.“
ნიკა ჭანტურია: „დავიწყებ იმით, რომ ძალიან სასიამოვნოა საქართველო პირველ კალათაში რომ არის. ყველას ერთი სული გვაქვს გავიგოთ, ვინ იქნებიან ჩვენი მეტოქეები ელიტრაუნდში და წილისყრას მოუთმენლად ველოდებით. ერთადერთი, მეორე კალათიდან მეტოქედ გერმანიას არ ვისურვებდი, მაგრამ თუ მოხდა და ჯგუფში მათთან ერთად აღმოვჩნდით, ყველაფერს გავაკეთებთ, რომ ევროპის ჩემპიონატზე სწორედ ჩვენ გავიდეთ და არა ისინი. მიმაჩნია, რომ საქართველოს ამ ნაკრებს შანსები ყველა გუნდთან აქვს და ეს შანსები აუცილებლად უნდა გამოვიყენოთ.“
საქართველოში არ იმყოფება 19-წლამდე ნაკრების მთავარი მწვრთნელი – ვასილ მაისურაძე, რომელიც სფფ-ის ეგიდით ჰოლანდიაში, მწვრთნელთა სემინარზე იმყოფება. წილისყრის შემდეგ, ვასილ მაისურაძის პირველ კომენტარსა და შეფასებებს სფფ-ის ოფიციალური ვებ-გვერდის მეშვეობით გაეცნობით.
ხვალინდელი წილისყრა თბილისის დროით 14:30 წუთიდან დაიწყება და თავდაპირველად, 17-წლამდე ნაკრების მეტოქეთა ვინაობას შევიტყობთ, რაზეც გუშინ უკვე ვწერდით. 15:15 წუთიდან კი, უკვე 19-წლამდელთა წილისყრა დაიწყება.
სფფ-ში დამკვიდრებული ერთგვარი ტრადიციის მიხედვით, ნაკრებების მწვრთნელები და ფეხბურთელები წილისყრას ფედერაციის ოფისში ერთად უყურებენ.
სფფ-ის პრესსამსახური
