ფერდინანდი: ”მანჩესტერ იუნაიტედს” ყველაფრის მოგება შეუძლია”
”მანჩესტერ იუნაიტედის” მცველის რიო ფერდინანდის აზრით, პრემიერ ლიგის სასტარტო ტურების შედეგებიდან გამომდინარე, დასკვნების გაკეთება საჭირო არ არის.
შეგახსენებთ, რომ სამ ტურში დევიდ მოიესის გუნდმა თავის ანგარიშზე მხოლოდ ოთხი ქულა ჩაიწერა.
”ჩვენ საკმაოდ ძლიერი გუნდი გვყავს, რომელიც ყველაფერს მოიგებს”, – განუცხადა ფერდინანდმა London Evening Standard-ს.
”შარშან პრემიერ ლიგა საკმაოდ ადვილად მოვიგეთ და გუნდი ასე მალე ვერ შეიცვლებოდა. გვჯერა იმ შემადგენლობის, რომელიც ახლა გვყავს. ნებისმიერ შემთხვევაში, სამი ტურის შემდეგ, დასკვნების გაკეთება არ შეიძლება”.
მეოთხე ტურში მანჩესტერელებს მდგომარეობის შედარებით გაუმჯობესების შანსი ექნებათ, რადგან ისინი ”ოლდ ტრაფორდზე” ”კრისტალ პალასს” მიიღებენ.
შეგახსენებთ იმასაც, რომ სატრანსფერო ფანჯრის ბოლო საათებში, ”წითელმა ეშმაკებმა” ”ევერტონის” უკვე ყოფილი ნახევარმცველი მარუან ფელაინი დაიმატეს.
ალექსანდრე მატევოსოვი
