ინიესტა: “საუკეთესო ფორმაში ჯერ კიდევ არ ვართ”

კატალონიის “ბარსელონას” ნახევარმცველი, ანდრეს ინიესტა აცხადებს, რომ გუნდი საუკეთესო ფორმაში ჯერ არ იმყოფება.

შეგახსენებთ, რომ შაბათს, “ბლაგაურნამ” ესპანეთის პრიმერა დივიზიონში მადრიდის “რეალი” საკუთარ მოედანზე მიიღო და მეტოქე ანგარიშით 2:1 დაამარცხა.

“საუკეთესო ფრომაში ჯერ კიდევ არ ვართ. სეზონის დასრულებამდე, დიდი დროა დარჩენილი, ამიტომ მალე ყველაფერი მოგვარდება”,- ამბობს ინიესტა.

ესპანეთის ჩემპიონატში, კატალონიელები 28 ქულით, პირველ პოზიციაზე იმყოფებიან. “ბარსელონას” ერთი ქულით ჩამორჩება მეორე ადგილოსანი “ატლეტიკო”, ხოლო მადრიდის “რეალს” “ბლაგაურნამდე” ექვსი ქულა აშორებს.

“რა თქმა უნდა, იმაზე საუბარი, რომ ჩემპიონები ჩვენ გავხდებით, ჯერ ადრეა. ცხადია, მადრიდის “რეალთან” გამარჯვება ჩვენთვის ბევრს ნიშნავს, მაგრამ გადაწყვეტილი არაფერია”, – დაასრულა 29 წლის ფეხბურთელმა.

დიტო ჭიჭინაძე