მარადონამ აგუეროს უნებისყოფო უწოდა

დიეგო მარადონა თვლის, რომ „მანჩესტერ სიტის“ თავდამსხმელი სერხიო აგუერო უნებისყოფო ადამიანია.

აგუერო მიმდინარე წლის იანვრის თვეში გაშორდა მეუღლეს, მარადონას ქალიშვილ ჯანინას, რომელთან ერთადაც ოთხი წლის განმავლობაში ცხოვრობდა. ამ დროისთვის ჯანინა ვაჟიშვილ ბენჟამინთან ერთად მადრიდში ცხოვრობს.

„ის უნებისყოფოა. მისი სახელის ხსენებაც არ მინდა. ჩემი შვილის ადვოკატთან მომდევნო შეხვედრაზე დასწრება მეც მინდა. მაინტერესებს, რითი გაიმართლებს თავს ის (აგუერო)“, – ციტირებს მარადონას სიტყვებს „ინდეპენდენტი“.

30 ოქტომბერს დიეგოს 53 წელი შეუსრულდა. ლეგენდარულმა არგენტინელმა ფეხბურთელმა იუბილე დუბაიში აღნიშნა.

„ორი დღით ადრე ბენჟამინმა ასეთი რამ მითხრა: „ბაბუა, თუ ამ დღეს ვერ გნახავ, მაშინ წინასწარ მოგილოცავ იუბილეს“. ამ სიტყვებმა ამატირა“, – აღნიშნა მარადონამ.

ბექა დოგრაშვილი