დანი უელბეკი: „არ ვიცი, რა სჭირს „მანჩესტერს“

„მანჩესტერ იუნაიტედის“ თავდამსხმელ დანი უელბეკისთვის გაუგებარია, რატომ არის მისი გუნდი ასეთ ცუდ ფორმაში. „წითელმა ეშმაკებმა“ ბოლო სამი მატჩი ანალოგიური ანგარიშით დათმეს — 1:2.

„ვერ გეტყვით, ეს რატომ ხდება. გასულ წელს ჩემპიონები გავხდით, დღეს შექმნილი მდგომარეობა კი ლოგიკას არ ექვემდებარება. ჩვენთვის ეს უჩვეულო სიტუაციაა, თუმცა წინ დამაჯერებლად უნდა გავიხედოთ. შორეულ მომავალში კი არ უნდა ვიცქირებოდეთ, არამედ თითოეული მატჩისთვს შესაბამისი მომზადებაა საჭირო.

ყველაფერი ჩვენზეა დამოკიდებული. ვერც პრესა და ვერც ვინმე სხვა ამ სიტუაციას ვერ შეცვლის, მდგომარეობის გამოსწორება მხოლოდ ჩვენ შეგვიძლია. მომდევნო მატჩის მოგება აუცილებელია. დამატებით მოტივაციას ვგრძნობ, რადგან „მანჩესტერ იუნაიტედის“ დიდი ქომაგიც ვარ. მტკივნეულია საყვარელი გუნდის მარცხის ხილვა. ჩვენი გულშემატკივრების შეშფოთება გასაგებია. ჩემპიონთა ლიგის ზონას ჩამოვრჩებით. მთავარი მწვრთნელი დევიდ მოიესი ოპტიმისტურად არის განწყობილი. მან იცის, რა უნდა გავაკეთოთ ფეხბურთელებმა“, – უელბეკის სიტყვები „სქაი სპორტსმა“ გამოაქვეყნა.

„მანჩესტერ იუნაიტედი“ მომდევნო მატჩს 11 იანვარს, შინ, „სუონსი სიტის“ წინააღმდეგ გამართავს.

ბექა დოგრაშვილი