„დილა“ სლოვენიელებთან დამარცხდა

თურქული შეკრების მესამე მატჩი გორის „დილამ“ სლოვენიის ჩემპიონატის ლიდერ „მარიბორთან“ გამართა და ანგარიშით 0:3 დამარცხდა.

მატჩის საწყის წუთებში „დილას“ ფეხბურთელები აქტიურობდნენ და ჰქოდათ რამდენიმე ხელსაყრელი მომენტი. ყველაზე ახლოს მე-19 წუთზე კვარაცხელია იყო, რომელსაც ახლო მანძილიდან მეკარემ აჯობა, ხოლო დამატებაზე შალამბერიძეს ხელი შეუშალეს და თავით ზუსტად ვეღარ დაარტყა.

სლოვენიელები სათამაშო უპირატესობას ნელ-ნელა დაეუფლნენ და 24-ე წუთზე გოლის გატანა შეეძლოთ, თუმცა ერთი-ერთზე შეყრილაძემ ითამაშა კარგად. 29-ე წუთზე კი მერტელმა შორიდან ძლიერი დარტყმით და მცირე რიკოშეტის შედეგად შანსი არ დაუტოვა მეკარეს და ანგარიში გახსნა – 1:0.

ამის შემდეგაც მეტოქე დომინირებდა და 37-ე წუთზე ზახოვიჩმა გორელთა საჯარიმოში ცრუ მოძრაობის შემდეგ მარჯვენა დაბალ კუთხეში დაარტყა, მეკარე კი შეწვდა თუმცა ბურთი მაინც ბადეში გაეხვა – 2:0. ტაიმის ბოლოს ბექამ კიდევ ერთხელ იხსნა გორელები და შორეული დარტყმული ნახტომში მოიგერია. პირველი ნახევარი ამ ანგარიშით დასრულდა.

მეორე ტაიმშიც სლოვენიელები დომინირებდნენ. დასაწყისშივე „დილას“ არ გაუმართლა. კოშკაძის საჯარიმო დარტყმული ხარიხასს მოხვდა.

55-ე წუთზე ოტიჩმა „დილას“ საჯარიმოში ბურთი მიიღო და მშვიდად შეძლო მისი კარის ჩარჩოში გადაგზავნა – 3:0. ოთხ წუთში ანგარიშის გაზრდის კარგი შესაძლებლობაც ჰქონდათ, თუმცა „დილას“ კიპერმა კიდევ ერთხელ აჯობა მეტოქეს. საბოლოოდ ქართველები მეტოქესთან დამარცხდნენ ანგარიშით 3:0.

გორელები დასკვნით მატჩს 13 თებერვალს ბოსნიურ „სარაევოს“ წინააღმდეგ გამართავენ, რომელიც თავის ჩემპიონატში მეორე ადგილზე იმყოფება.

„დილამ“ ასეთი შემადგენლობით ითამაშა: შეყრილაძე, ორბელაძე, კვახაძე, თომაშვილი, ჯიშკარიანი, რაზმაძე, გურეშიძე, კოშკაძე, რაჟამაშვილი, შალამბერიძე, კვარაცხელია.

ასევე ითამაშეს: ბერიაშვილი, გაფრინდაშვილი, კორღალიძე, წიქარიძე, შენგელია, ახალკაცი.

„დილას“ პრესსამსახური