უკრაინის ფეხბურთის ფედერაციის შენობაში შეიარაღებული პირები შეიჭრნენ
ინციდენტი მოხდა უკრაინის ფეხბურთის ფედერაციის ოფისში.
aif.ua-ს ცნობით, 28 თებერვალს, შენობასთან რამდენიმე ავტობუსი მივიდა, საიდანაც შეიარაღებული პირები გადმოვიდნენ. მათგან დაახლოებით 25 კაცი ოფისში შეიჭრა და ფედერაციის პრეზიდენტ ანატოლი კონკოვს სულ ნახევარი საათი მისცა, რომ გადადგომის თაობაზე განცხადება დაეწერა.
„უცნობებმა განაცხადეს, რომ თუ პრეზიდენტი გადადგომაზე უარს იტყოდა, სისხლი დაიღვრებოდა“, – აღნიშნა თვითმხილველმა.
ფედერაციის თანამშრომლებმა მოგვიანებით სამართალდამცავები გამოიძახეს, მოხდა შენობის ევაკუაცია. ოფისში შეჭრილმა პირებმა ცეცხლი გახსნეს, თუმცა მალევე ისინი დააკავეს. დაკავებულებმა განაცხადეს, რომ კიევის „დინამოს“ ულტრასები არიან, აღნიშნული აქცია რამდენიმე პირმა დაგეგმა და ამისთვის ორგანიზატორებმა მათ თანხა გადაუხადეს.
უკრაინის ფეხბურთის ფედერაციის პრეზიდენტი აცხადებს, რომ მომხდარის შესახებ ფიფასა და უეფას აცნობებს.
უკრაინული ტელეარხი ICTV ავრცელებს ვიდეოს, რომელშიც აღბეჭდილია, თუ როგორ შედიან უცხო პირები უკრაინის ფეხბურთის ფედერაციის ოფისში.
