სტივ ნეში შემდეგი სეზონისთვის დარჩენას გეგმავს

„ლოს-ანჯელეს ლეიკერსის“ გამთამაშებელმა სტივ ნეშმა ჯანმრთელობასთან დაკავშირებული პრობლემების გამო მიმდინარე რეგულარულ ჩემპიონატის მხოლოდ ათ მატჩში ითამაშა. ამასთან ერთად, კანადელს კალიფორნიაში კონტრაქტის ვადის ამოწურვამდე დარჩენა სურს.

„შემიძლია დაგიდასტუროთ, რომ შემდეგ სეზონში მოედანზე დაბრუნების სურვილი მაქვს“, – განუცხადა ნეშმა „ლოს-ანჯელეს თაიმსს“.

კონტრაქტის მიხედვით, შემდეგ სეზონში ვეტერანმა 9,7 მილიონი დოლარი უნდა მიიღოს. კალიფორნიულ კლუბს კი ნეშთან ხელშეკრულების გაწყვეტის უფლება პირველ სექტემბრამდე აქვთ.

ალექსანდრე მატევოსოვი