ქართველთა გამარჯვებები ჰარუ ბაშოზე

ოსაკაში მიმდინარე ჰარუ ბაშოს მე-5 დღე წარმატებული გამოდგა ორივე ჩვენებურისთვის.
დღეს ჩვენმა ტოჩინოშინმა მესამე ორთაბრძოლაც მარტივად მოიგო. ქართველმა ექს-სეკიტორმა მაკუშიტას 57-ე ნომერ, იაპონელ კეიტენკაის სძლია.
თუმცა, ორთაბრძოლის დასაწყისში მცირე ნერვიულობა მოგვიწია – იაპონელმა ტაჩიაი-ჰენკა (სასტარტო ჯახისთვის თავის არიდება) გაუკეთა ლევანს და წონასწორობა დააკარგვინა. თუმცა, ტოჩიმ უმალვე შეძლო თავის შემაგრება, ისე რომ დოჰიოს არ შეხებოდა, აგრესიულად შეუტია ჩია ტანის მეტოქეს და ცუკიტაოშით მოისროლა დოჰიოდან.
შედეგად, ლევან გორგაძემ უკვე მე-3 მოგება ჩაიწერა აქტივში და კვლავაც დაუმარცხებლად აგრძელებს ასპარეზობას.
ტოჩინოშინს მხარი გაგამარუმაც აუბა და მანაც მარცხი აგემა თავის მეტოქეს.
ჩვენმა გოლიათმა მე-7 მაეგაშირად განთესილი იაპონელი გოლიათი ტოიოჰიბიკი ოშიდაშით გააძევა დოჰიოდან და მცირედით გამოისწორა მდგომარეობა.
გაგა ჯუღელის ბალანსში ახლა უკვე 2 მოგება და 3 მარცხია. მისი მომდევნო მეტოქე “პატარა ტანკად” წოდებული, იაპონელი მე-6 მაეგაშირა ტაკეკაძე იქნება, რომელსაც ჩვენებურის საპირისპირო ბალანსი აქვს ბაშოზე (3-2). ურთიერთშეხვედრებში კი გაგა 6:4-ს უგებს “პატარა ტანკს”.
ტოჩინოშინს რაც შეეხება, იგი ხვალ ისევ ისვენებს და მომდევნო ორთაბრძოლას სავარაუდოდ ზეგ ჩაატარებს.
5 ტურის შემდეგ ჰარუ ბაშოს მხოლოდ სამი დაუმარცხებელი სუმოისტი შემორჩა და სამივე მათგანი არაიაპონელი გახლავთ. აქედან ორი მონღოლი იოკოძუნაა (ჰაკუჰო და ჰარუმაფუჯი), ერთიც კი ეგვიპტელი მე-11 მაეგაშირა, ოსუნაარაშია.
დღეს პირველი მარცხი იწვნია ტურნირზე ორმა იაპონელმა სეკიტორმა – ოძეკი კისენოსატომ და სეკივაკე გოეიდომ. კისენოსატოს დამარცხება იაპონელთა ამომავალმა ვარსკვლავმა, პირველმა მაეგაშირა ენდომ შეძლო, ცუკიოტოშით, რომელმაც სხვათა შორის, პირველი გამარჯვება იზეიმა მიმდინარე ბაშოზე.
გოეიდოს რაც შეეხება, მან მისდარად სეკივაკეს ტიტულის მქონე იაპონელ ტოჩიოძანთან დათმო შეხვედრა, ოშიდაშით.
ამასთან, ერთი საინტერესო ფაქტიც დაფიქსირდა გოეიდოსთვის: უკვე ზედიზედ მესამე ბაშოა, როცა იგი სწორედ მე-5 ტურში განიცდის პირველ მარცხს, ხოლო აქედან ბოლო ორ ბაშოზე სწორედ ტოჩიოძანისგან იგემა ეს პირველი წაგებები.
ძალიან ცუდ ფორმაშია კიდევ ერთი სეკივაკე, ბულგარელი კოტოოშუ – მან დღეს ზედიზედ მე-4 წაგება მიითვალა ბაშოზე და თუ ამ ტემპით გააგრძელა სვლა, უარყოფით ბალანსსაც მალე მიუკაკუნებს.
ბოლოს კი უმაღლესი დივიზიონის დღევანდელი ბრძოლების ვიდეო მიმოხილვასა და ტოჩინოშინის ორთაბრძოლის ვიდეოს შემოგთავაზებთ.

ამირან ურუშაძე