“ჩიხურა” – “ტორპედო” 1:2
16 მარტს, საქართველოს 25-ე ეროვნული ჩემპიონატის უმაღლესი ლიგის 22-ე ტურის მატჩები გაიმართა. ქუთაისის „ტორპედო“ სტუმრად ივანწმინდის განახლებულ სტადიონზე საპრიზო ადგილებზე მყოფ საჩხერის „ჩიხურას“ დაუპირისპირდა.
შეხვედრა მასპინძელთა დომინირებით დაიწყო, თუმცა ქუთაისელთა პირველივე სახიფათო იერიშს გოლი მოჰყვა, რომელიც ბევრ წამყვან ჩემპიონატსაც კი მოუხდებოდა იმიტომ, რომ ეს შეტევა ტორპედოელთა საჯარიმოდან დაიწყო და კომბინაციური თამაშის შემდეგ ისე დაგვირგვინდა შედეგიანად, ბურთს ვერცერთი მეტოქე გუნდის ფეხბურთელი ვერ შეეხო. ამ საგოლე შეტევის(მე-7 წუთზე) ბოლო ფაზა ასეთი იყო – ელიავამ გონივრული პასით ადამაძე მონახა, რომლის გადაცემით მამუკა ღონღაძემ „ტორპედოში“ დაბრუნებიდან თავისი მე-3 გოლი გაიტანა – 0:1. დაწინაურებამ სტუმრები ოდნავ მოადუნა, ამით „ჩიხურამ“ ისარგებლა და სათამაშო უპირატესობა იგდო ხელთ. აქედან გამომდინარე ლოგიკური იყო საპასუხო გოლი, იქამდე კი კვასხვაძემ არაერთ დარტყმულ ბურთზე ითამაშა დამაჯერებლად. 23-ე წუთზე, დეკანოიძის ჩაწოდებით ბურთი ჰაერში ერთ-ერთ ტორპედოელს მოხვდა და ტრაექტორია ოდნავ იცვალა, რის შემდეგაც ზუსტ ადგილზე გიორგი გაბედავა დახვდა და ასევე ზუსტად დაარტყა – 1:1. 26-ე წუთზე, თამაშში ქუთაისელი ოლეგ მამასახლისი ჩაერთო, ეს აღსანიშნავი იმით იყო, რომ დღეს, უმაღლეს ლიგაში მისი დებიუტი შედგა, თანაც საკმაოდ კარგი. მოვლენების ასეთი განვითარებით თითქოს ლოგიკური იყო, რომ ფსიქოლოგიური უპირატესობაც მასპინძელთა მხარეს უნდა გადასულიყო, მაგრამ ასე არ მოხდა, ტორპედოელები გამოფხიზლდნენ და კოლექტიური თამაშის ხარჯზე ხელახლა დაიწყეს სასურველი შედეგისკენ სწრაფვა. 32-ე წუთზე, ჩიკვილაძის ჩაწოდებით მარკოზაშვილმა 6-7 მეტრიდან მცველთან ჭიდილში ბურთი კარის მიმართულებით გაგზავნა, სომხიშვილმა ძლივსძლივობით შეძლო დარტყმულის მოგერიება. „ჩიხურადან“ თავით ჯიღაურის, ხოლო ფეხით გაბედავასა და გრიგალაშვილს სახიფათო დარტყმებმა ვერაფერი ვერ დააკლო „ტორპედოს“. გუნდებიც ასეთი ანგარიშით გავიდნენ შესვენებაზე.
მეორე ტაიმში კი ქუთაისელებმა მოსაგებად შემართულ მეტოქეს არაფერი არ დაუთმეს. 47-ე წუთზე, ჩიკვილაძემ შეასრულა საჯარიმო დარტყმა სახიფათოდ, მეკარემ ნახტომში მოიგერია ბურთი. 54-ე წუთზე, ღონღაძემ კვარაცხელიას წაართვა ბურთი და მეკარესთან პირისპირ დარჩა, მაგრამ მან კიპერს გაარტყა ბურთი და ასპროცენტიანი შანსი ვერ გამოიყენა. ამის გამო 62-წუთზე საჩხერელებს შეეძლოთ დავესაჯეთ, თუმცა გრიგალაშვილის გაკეთებული გადაცემით გაბედავას ოდნავ დააკლდა სიზუსტე. 65-ე წუთზე, მარჯვენა ფლანგიდან კვერნაძის დარტყმისა და მეკარის მიერ ბურთის გადაგდების შედეგად დანიშნული კუთხური ჩიკვილაძემ ჩააწოდა შორეულ ძელთან, სადაც ტანმაღალმა ლატვიელმა მცველმაიგორ სავჩენკოვსიმ დაასწრო ყველას და თავით მისი პირველი და თანაც „ტორპედოსთვის“ გამარჯვების მომტანი გოლი გაიტანა ქართულ უმაღლეს ლიგაში – 1:2. „ჩიხურა“ გააქტიურებას ცდილობდა, მაგრამ „ტორპედოს“ დალაგებულმა თამაშმა მათ მეტწილად ამის საშუალება არ მისცა, მიუხედავად აღნიშნულისა, ორჯერ მაინც მოუწია კვასხვაძეს თავისი ოსტატობის გამოვლენა, კაპიტანმა ჯერ გაბედავას დარტყმული არ გაუშვა სტანდარტიდან, შემდეგ კი გრიგალაშვილის დარტყმის შედეგად რიკოშეტიც მოიგერია. სხვაობის გაზრდაც არავის არ გაუკვირდებოდა, მას შემდეგ, რაც კვერნაძემ მეკარესთან პირისპირ ორჯერ გასვლის შემდეგ ვერ იხეირა. საბოლოოდ, „ტორპედომ“ „ჩიხურასთან“ ქუთაისში განცდილი მარცხისთვის(1:2) დამსახურებული რევანში აიღო(2:1) და ამ გამარჯვებით რევაზ ძოძუაშვილის შეგირდები ჩემპიონატის ახალ ეტაპს იმედიანად ხვდებიან…
შემადგენლობები, სტატისტიკა, ფოტოგალერეა – http://www.fctorpedo.ge/index.php?geo&game=235
FCTorpedo.GE
