რიბერი: „დღეს მე ჩემი სახეც მომწონს“
პარასკევს, ევროპაში კიდევ ერთი საფეხბურთო წიგნი იხილავს დღის სინათლეს. წიგნი სახელწოდებით „ფრანკი“ მიუნხენის „ბაიერნის“ ფრანგ ნახევარმცველ ფრანკ რიბერის შესახებ მოგვითხრობს. ჩვენი ჟურნალი აღნიშნულ წიგნში შესულ რიბერის რამდენიმე ციტატას გაგაცნობთ.
შესავალში წიგნის ავტორი რამდენიმე ადამიანს რიბერის დახასიათებას სთხოვს. ერთ-ერთი მათგანი ფრანკის თანაკლუბელი დანიელ ვან ბუიტენი გახლავთ.
„საფეხბურთო ინდუსტრიაში ბევრ მეგობარს ვერ გაიჩენ. ფრანკი ის მეგობარია, რომელიც მთელი ცხოვრება გაგყვება“, – აღნიშნავს ბელგიელი მცველი.
ფრანკ რიბერის ციტატები:
იარების შესახებ:
1985 წელს ავტომობილი, რომლითაც რიბერის ოჯახი მგზავრობდა, სატვირთო მანქანას დაეჯახა. გამგზავრებამდე ორი წლის ფრანკის მამას შვილისთვის უსაფრთხოების ქამრის შეკვრა დაავიწყდა, რიბერიმ თავი საქარე მინას დაარტყა. სწორედ ამ პერიოდიდან აქვს მას სახის მარჯვენა მხარეს ორი გრძელი იარა. წლების შემდეგ, როდესაც ის მარსელის „ოლიმპიკში“ პოპულარული ფეხბურთელი გახდა, ადგილობრივმა მაღაზიამ ჰელოუინის დღეობაზე გასაყიდად რიბერის ნიღბები გამოიტანა – რა თქმა უნდა, საშინელი ნაიარევით. ფეხბურთელს პლასტიკური ოპერაცია შესთავაზეს, მაგრამ მან უარი განაცხადა: „ეს იარები ძალას მმატებს. ბავშვობაში დამცინოდნენ, შეურაცხყოფას მაყენებდნენ, მაგრამ ამან უფრო გამაძლიერა… იარებს არ მოვიშლი, რამდენიც არ უნდა გადამიხადონ!“
„ბავშვობაში კვაზიმოდოს მეძახდნენ. წარმოგიდგენიათ? ასე მომართვა გულს ძალიან მტკენდა. რომ არა ეს იარა, მეც ჩვეულებრივი ბიჭი ვიქნებოდი. ახლა გაცილებით ძლიერი ხასიათი მაქვს, გამარჯვებისკენ მივისწრაფი. დღეს მე ჩემი სახეც მომწონს. მიყვარს ჩემი ცხოვრება“.
მშენებლობაზე მუშაობის შესახებ:
„მამამ პნევმატური ჩაქუჩი მომცა და მეც საქმეს შევუდექი. მუშაობა ახალი დაწყებული მქონდა, როცა მამა სამშენებლო ხარაჩოდან ჩამოვარდა. მაშინ მივხვდი, რომ მამაჩემის საქმიანობა ადვილი სულაც არ ყოფილა. მივხვდი იმასაც, რომ ეს ჩემი საქმე არ იყო. ისღა დამრჩენოდა, ფეხბურთელი გავმხდარიყავი“.
პირველი შვებულების შესახებ (2004 წელს):
რიბერის რეაქცია, როდესაც „მეცის“ მწვრთნელმა ჟან ფერნანდესმა უთხრა, რომ ერთკვირიანი შვებულებით მეუღლესთან ერთად ტუნისში გამგზავრება შეეძლო. ჟან ფერნანდესი იხსენებს:
„წარმოიდგინეთ: ეს ცხოვრებაში მისი პირველი შვებულება იყო. ის პირველად გაემგზავრა თვითმფრინავით. მოგვიანებით დავურეკე და ასეთი რამ მითხრა: მწვრთნელო, ძალიან მომწონს! ჩემი მეუღლე ახლა აუზში ცურავს. ძალიან მაგარია!“
ბექა დოგრაშვილი
ჟურნალი Fanebi.com
