რამირესი გვპირდება
ბრაზილიის ნაკრების ნახევარმცველი რამირესი აცხადებს, რომ დამდეგ მსოფლიოს ჩემპიონატზე ყვითელი ბარათების მიღებას მაქსიმალურად მოერიდება.
ოთხი წლის წინათ, სამხრეთ აფრიკაში გამართული მუნდიალის მერვედფინალურ ეტაპზე ჩილეს ნაკრების წინააღმდეგ გამართულ შეხვედრაში რამირესმა მეორე გაფრთხილება მიიღო და ტურნირის მეოთედფინალში ჰოლანდიელებთან გამართული მატჩი გამოტოვა, რომელიც მისმა გუნდმა ანგარიშით 1:2 წააგო.
„წინა მსოფლიოს ჩემპიონატზე მომხდარი შემთხვევებიდან სათანადო დასკვნა გავაკეთე. მოედნის ცენტრში თამაშის წესის დარღვევამ მომდევნო ეტაპის მატჩი გამომატოვებინა. ასეთ შეცდომას აღარ დავუშვებ. არ მინდა, რომელიმე შეხვედრა გამოვტოვო.
ვამაყობ „ჩელსიში“ ჩემი თამაშითა და მონაცემებით. სასიამოვნოა, რომ ბურთის ართმევების რაოდენობით მეორე პოზიციაზე ვარ, თუმცა ნაკრებში ოდნავ განსხვავებული საქმით დავკავდები. ვეცდები, რომ მსოფლიოს ჩემპიონატზე სტატისტიკა კიდევ უფრო გავიუმჯობესო“, – რამირესის სიტყვები Goal.com-მა გამოაქვეყნა.
ბექა დოგრაშვილი
