ბლატერი ფიფას საპრეზიდენტო არჩევნებზე საკუთარ კანდიდატურას წარადგენს

ფიფას 78 წლის პრეზიდენტმა იოზეფ ბლატერმა გადაწყვიტა, კიდევ ერთხელ წარადგინოს საკუთარი კანდიდატურა მსოფლიოს ფეხბურთის მმართველი ორგანოს პრეზიდენტის პოსტზე.

“სან პაულუში გამართულ კონგრესზე ძლიერი მხარდაჭერა ვიგრძენი. ძალიან მნიშვნელოვანი იყო იმის მოსმენა, თუ როგორ მთხოვენ ფიფას პრეზიდენტის პოსტზე დარჩენას.
ჩემი გადაწყვეტილების შესახებ აღმასრულებელ კომიტეტს ვაცნობებ და კანდიდატურას წარვადგენ. ჩემი მისია ჯერ არ დასრულებულა”, – ბლატერის სიტყვებს Fox Sports-ი აქვეყნებს.

ცნობილია ისიც, რომ უეფას ამჟამინდელმა ხელმძღვანელმა მიშელ პლატინიმ ფიფას პრეზიდენტის პოსტზე საკუთარი კანდიდატურის წარდგენა გადაიფიქრა.

შეგახსენებთ, რომ ზეპ ბლატერი ფიფას 1998 წლიდან ხელმძღვანელობს, როცა ამ პოსტზე მან ჟოაო აველანჟი შეცვალა. ბლატერმა დაძაბულ საარჩევნო ბრძოლაში უეფას მაშინდელი პრეზიდენტი ლენარტ იუჰანსონი დაამარცხა, თუმცა შემდეგ ხმა დაირხა, ბლატერმა ამომრჩეველთა ნაწილი მოისყიდა და ასე გახდა ფიფას ხელმძღვანელიო. მას ამ ხნის განმავლობაში კიდევ არაერთი სკანდალი უკავშირდება და ბევრგან აითვალწუნეს კიდეც, განსაკუთრებით კი – დასავლეთ ევროპის ქვეყნებში. რაც არ უნდა იყოს, ბლატერი იხტიბარს არ იტეხს, თავის მოღვაწეობას დადებითად აფასებს და არც საპრეზიდენტო სავარძლის დათმობის სურვილი აქვს.

ფიფას საპრეზიდენტო არჩევნები 2015 წლის მაისში, შვეიცარიაში ჩატარდება.