სტივ ჯერარდის ალტერნატივები

“ლივერპულის” კაპიტან სტივენ ჯერარდს მიმდინარე სეზონის ბოლოს კლუბთან კონტრაქტი ეწურება და სულ უფრო აქტიურად საუბრობენ მისი “ენფილდიდან” შესაძლო აბარგების შესახებ.

ცნობილია, რომ 34 წლის ნახევარმცველის მიმართ რამდენიმე კლუბი იჩენს ინტერესს, მათ შორის “მანჩესტერ სიტიც”, თუმცა უფრო ხშირად ჯერარდის აშშ-ში შესაძლო გადასვლაზე საუბრობენ. ბრიტანულ პრესის ინფორმაციით, ინგლისელი ფეხბურთელით MLS-ის კიდევ ერთი კლუბი – “ტორონტო” დაინტერესდა.

არც ის არის გამორიცხული, რომ სტივ ჯერარდი “ლივერპულში” დარჩეს, თუმცა ამ შემთხვევაში, მისი ჯამაგირი მნიშვნელოვნად შემცირდება. კერძოდ, ახლა “წითლების” ლიდერი კვირაში 180 ათას ფუნტს იღებს, კონტრაქტის გახანგრძლივების შემთხვევაში კი, კვირაში 90 ათას ფუნტს უნდა დაჰყაბულდეს, 2016-17 წლების სეზონში ხელფასი სულაც 60 ათას ფუნტამდე შეუმცირდება. “ლივერპულის” ხელმძღვანელობა იმაზეც ფიქრობს, თუ რა ამპლუა მოარგონ ჯერარდს საფეხბურთო კარიერის დასრულების შემდეგ. შესაძლოა, სტივი კლუბის ერთ-ერთი მწვრთნელი გახდეს, ან “წითლების” ელჩის პოზიცია მოირგოს.