დარჩა 3 დღე – გრეგ ფიქი შერკინებას გვიქებს
ბორჯღალოსნები დუბლიმში ირლანდიასთან გასამართი ნოემბრის ტესტისათვის მზადებას აგრძელებენ. შეხვედრა, რომელსაც ქართული რაგბის ქომაგი 2007 წლის მსოფლიო თასის შემდეგ ელოდა კვირას, 16 ნოემბერს 18:30 საათზე დაიწყება. მატჩის პირდაპირ რეპორტაჟს საქართველოს საზოგადოებრივი მაუწყებლის პირველი არხი შემოგვთავაზებს.
შეხვედრამდე სამი დღით ადრე კი, „სამყურების“ შერკინების მწვრთნელი, გრეგ ფიქი სამხრეთ აფრიკასთან ჩატარებული მატჩისა და ბორჯღალოსნებთან მომავალი რკენის შესახებ საუბრობს.
“მთელი ყურადღება საქართველოს წინააღმდეგ გასამართი თამაშის მიმართ გვაქვს მიბყრობილი, მაგრამ სამხრეთ აფრიკის დამარცხებით გამოწვეული ტკბილ-მწარე გრძნობა ჯერ არ დაგვიწყებია. მორკინალთა უმეტესობა ასე გრძნობს თავს. თამაშის მოგებით უნდა გაიხარო, მაგრამ არ უნდა დაივიწყო რის ხარჯზე მიაღწიე ამას.“ განაცხადა გრეგ ფიქმა სამხრეთ აფრიკასთან ირლანდიის ნაკრების შერკინების თამაშის შეფასებისას.
“კარგად მოვემზადედ მომავალი თამაშისათვის. დიდ ყურადღებას ვაქცევთ იმას, რომ უაზრო ჯარიმები არ ავიღოთ შერკინებაში – ბურთის შეგდებამდე, რომ არ მივაწვეთ. სამხრეთ აფრიკასთან, როგორც სჩანს ცოტა ყურადღება მოვადუნეთ. შერკინებაში დაშვებული შეცდომების გამოსწორება გვინდა და ამისათვის ვერც კი ინატრებდი უკეთეს ოპონენტს, ვიდრე საქართველოა. ისინი ლამისაა ორი წლის ასაკიდან დგანან შერკინებაში. მათ ეს უყვართ და ძალიან კარგად გამოსდით.”
“საქართველოს ზოგიერთ თამაშს, რომ გადახედოთ – ქართველები საზრიანად თამაშობენ. მათი დაცვა საკმაოდ კარგად ამოდის და კეტავს ხაზს, შესაბამისად ამ გუნდთან ბურთის იქით-აქეთ გადაცემით იმაზე ფიქრით, რომ ლელოებს დაუდებ, ფონს ვერ გახვალ. კარგად უნდა იყო ორგანიზებული. მზად უნდა იყო მიწაზე რთული თამაშისათვის და ყოველთვის ფიქრობდე ბურთის შენარჩუნებაზე – ეს ის უმთავრესი რამ არის რის გაკეთებასაც ვეცდებით საქართველოსთან. შესაძლოა საქართველოს ნაკრებს განსაკუთრებული შედეგები არ ჰქონდეს, მაგრამ ბევრი გუნდისთვის სერიოზული პრობლემები შეუქმნია.
Rugby.GE
