ცხინვალი vs დინამო – მატჩამდე
დინამო თბილისი საქართველოს XXVI ეროვნული ჩემპიონატის XXV ტურის შეხვედრას საფეხბურთო კლუბ ცხინვალის წინააღმდეგ გამართავს. მატჩი 24 აპრილს თბილისში, მიხეილ მესხის სახელობის სტადიონის სათადარიგო მინდორზე გაიმართება და 16.00 საათზე დაიწყება. დაპირისპირების პირდაპირი რეპორტაჟის ხილვა ჩვენი კლუბის ოფიციალურ ვებ გვერდზე შეგეძლებათ.
ჩვენი მეტოქე
ცხინვალის საფეხბურთო კლუბმა, რომელიც 1936 წელს დაარსდა, არსებობის მანძილზე რამდენჯერმე შეიცვალა სახელწოდება. ცხინვალის კლუბი, რომელიც სპარტაკის სახელით ასპარეზობდა საბჭოთა კავშირის საფეხბურთო ჩემპიონატში და თასის გათამაშებაზე, ამიერკავკასიისა და სხვა და სხვა ზონების შეჯიბრებებში მონაწილეობდა. საბჭოთა პერიოდში ცხინვალის სპარტაკის საუკეთესო სეზონი 1987 წლით თარიღდება – ცხინვალელმა ფეხბურთელებმა საქართველოს საბჭოთა თასის გათამაშება ტრიუმფით დაასრულეს, სპარტაკმა ფინალურ შეხვედრაში ოზურგეთის მერცხალს 1:0 სძლია. საქართველოს დამოუკიდებელ საფეხბურთი ჩემპიონატებში ცხინვალის კლუბი თავდაპირველად (1990–2003 წლებში) ლიახვის სახელით ასპარეზობდა, 2003–2007 წლებში გუნდი ცხინვალის სახელით გამოდიოდა. 2007 წლიდან გუნდს კვლავ სპარტაკი ეწოდება, ხოლო 2015 წლიდან დაიბრუნეს ძველი სახელწოდება და კლუბს ცხინვალი დაერქვა. დამოუკიდებელი ქართული ფეხბურთის ისტორიაში, ცხინვალისთვის ყველაზე დასამახსოვრებელი 2009-10 წლების სეზონი გამოდგა, ჩვენმა მომავალმა მეტოქემ ჩემპიონატში მეხუთე ადგილი დაიკავა და საქართველოს დავით ყიფიანის თასის გათამაშების ნახევარფინალში იასპარეზა.
სამაჩაბლოში განვითარებული ცნობილი მოვლენების შემდეგ, გუნდმა დისლოკაციის ადგილი შეიცვალა და საშინაო შეხვედრებს ცხინვალის ნაცვლად გორში ატარებდა, თუმცა უმაღლეს ლიგაში დაბრუნებული ცხინვალი საშინაო შეხვედრებს თბილისში, მიხეილ მესხის სახელობის სტადიონზე მართავს.
მწვრთნელი და სპარტაკი
ცხინვალის მთავარი მწვრთნელის პოსტზე 2013 წლის ნოემბრიდან კახი კაჭარავა მუშაობს. წინა სეზონი გუნდმა 40 ქულით მეათე ადგილზე დაასრულა. მიმდინარე ტურნირში 24 ჩატარებული მატჩიდან ჩვენი მომავალი მეტოქე დაგროვილი 39 ქულით მეხუთე ადგილზე იმყოფება.
დინამომდე…
ცხინვალმა მიმდინარე ჩემპიონატის მეორე წრე ვიტ ჯორჯიასთან სათასო მარცხით 4:5 გახსნა. შემდეგ მინამალური მარცხი დილასგან 0:1. ამას ცხინვალმა 4 მატჩიანი მოგებათა სერია მიაბა. 2:0 მარტვილის მერანთან, 1:0 ვიტ ჯორჯიასთან, 4:1 იმავე ვიტ ჯორჯიასთან თასზე და 2:1 სამტრედიასთან. ამას კი მოჰყვა 4 მატჩიანი წაგებების სერია. ჯერ ტორპედომ დაამარცხა ცხინვალი 2:0, შემდეგ დინამო ბათუმმა მოიგო ჩვენს მომავალ მეტოქეს 1:0, ზუგდიდთან მარცხი 2:3 და თასის ნახევარფინალის პირველ შეხვედრაში 0:2 დინამო თბილისთან. ცხინვალმა შემდეგ გურიას მოუგო 3 უპასუხო ბურთით და მერე ჩიხურა დაამარცხა 3:1.
დინამო VS ცხინვალი
ურთიერთშეხვედრებში დინამოელთა უპირატესობა აშკარაა. ეროვნულ ჩემპიონატში დინამო და ცხინვალი ერთმანეთს 18– ჯერ დაუპირისპირდნენ 13 მოგება, 4 ფრე და 1 მარცხი. 44 გატანილი ბურთის საპასუხოდ მიღებული 11 გოლი – ასეთია დედაქალაქელთა მონაგარი.
ცხინვალთან ურთიერთშეხვედრებში დინამომ ერთადერთი მარცხი ოცდამეერთე ჩემპიონატის ოცდამეათე ტურში განიცადა. 2010 წლის 18 აპრილს ჩატარებული შეხვედრა, ჩვენი მეტოქის სასარგებლოდ ანგარიშით2:1 დასრულდა. მტკვრისპირელებმა დიდი ანგარიშით რამდენჯერმე იმარჯვეს. გასვლაზე გორში ორჯერ დაამარცხეს ცხინვალი ანგარიშით 3:0. 2007 წლის 15 სექტემბერს მეცხრამეტე ჩემპიონატის მეხუთე ტურში და 2008 წლის 29 ნოემბერს მეოცე ჩემპიონატის მეცამეტე ტურში. თბილისში კი 2009 წლის 16 აგვისტოს ოცდამეერთე ჩემპიონატის პირველ ტურში დინამომ გამანადგურებელი ანგარიშით 5:0 აჯობა მეტოქეს. ასევე დიდი ანგარიშით იმარჯვა დინამომ ამ გუნდების ბოლო საჩემპიონატო დაპირისპირებაში. 24 ოქტომბერს დინამო არენაზე ჩვენმა გუნდმა 6:1 მოუგო ცხინვალს. გიორგი პაპუნაშვილის ჰეთ თრიქს თითო გოლი ლაშა პარუნაშვილმა, ირაკლი ძარიამ და მათე ცინცაძემ მიამატეს.
უკანასკნელი მატჩი დინამოსა და ცხინვალს შორის 7 აპრილს, საქართველოს თასის ნახევარფინალში გაიმართა. დაპირისპირება დინამო არენაზე ჩვენი გუნდის გამარჯვებით- 2:0 დასრულდა. ცხინვალის კარში გოლები მათე ცინცაძემ და დავით ვოლკოვმა გაიტანეს.
დისკვალიფიცირებული ფეხბურთელები
ხვალინდელ შეხვედრაში დისკვალიფიკაციის გამო დინამო თბილისი გიორგი პაპუნაშვილს მოისაკლისებს.
დინამო vs ცხინვალი – მსაჯი
საქართველოს ჩემპიონატის 25- ე ტურის შეხვედრას, რომელსაც ჩვენი გუნდი ცხინვალის წინააღმდეგ გამართავს– აბდულა ბასლეჰლო განსჯის. მას ასისტენტობას ზ. მენთეშაშვილიდა ლ. ვარამიშვილი გაუწევენ. დამატებითი ასისტენტები იქნებიან გ. დოგრაშვილი და შ. ქუხილავა.სათადარიგო მსაჯის ფუნქციებს კი ბ. გლუშჩუკი შეასრულებს.
უკანასკნელი მატჩი, რომელიც აბდულა ბასჰლელომ იმსაჯა, პირველ ლიგაში გამართული ლოკომოტივი 6:0 მაჭახელა გახლავთ. აღნიშნულ მატჩში სირიელმა არბიტრმა ოთხჯერ გააფრთხილა ფეხბურთელები და ერთხელაც წითელი ბარათი გამოიყენა.
ჩვენი გუნდის მონაწილეობით აბდულა ბასლეჰლომ უკანასკნელად 2014 წლის 18 ნოემბერს ქობულეთში გამართული სათასო შუქურა 1:1 დინამო იმსაჯა. აღნიშნულ მატჩში აბდულა ბასლეჰლომ ორი ფეხბურთელი გააფრთხილა.
ჩვენს მიერ მოპოვებულ მასალებზე დაყრდნობით, მეტი თვალსაჩინოებისათვის, აბდულა ბასლეჰლოს მიერ განსჯილი შეხვედრების სტატისტიკურ მონაცემებს გთავაზობთ:
აბდულა ბასლეჰლო
დაბადების თარიღი: 1976 წლის 8 მარტი
===========================================
უმაღლესი ლიგა – 24 თამაში / 110 ყვითელი / 6 წითელი / 7 პენალტი
პირველი ლიგა – 19 თამაში / 89 ყვითელი / 7 წითელი / 14 პენალტი
მეორე ლიგა – 16 თამაში / 59 ყვითელი / 4 წითელი / 8 პენალტი
საქართველოს თასი – 4 თამაში / 20 ყვითელი / 0 წითელი / 1 პენალტი
ცხინვალის სავარაუდო შემადგენლობა
ჩვენი ვარაუდით ხვალინდელ დაპირისპირებაში, ცხინვალელთა სასტარტო შემადგენლობა ასეთი იქნება:
ნადირაძე – მაისაშვილი, მახარობლიძე, ჯიშკარიანი, კილასონია – თარხნიშვილი, ცერცვაძე, მარკოზაშვილი, ივანიშვილი – კაჭარავა, შინდაგორიძე
FCDinamo.GE
