შოთა ხაბარელმა სპორტის მინისტრის პოსტზე სასურველი კანდიდატურა დაასახელა
საქართველოს პარლამენტის სპორტისა და ახალგაზრდულ საქმეთა კომიტეტის წევრმა შოთა ხაბარელმა მინისტრის პოსტზე მისთვის სასურველი კანდიდატურა დაასახელა. კითხვაზე, არსებობს თუ არა აღნიშნულ პოსტზე კანდიდატურა, რომელსაც კომიტეტი რეკომენდაციას გაუწევს, ხაბარელმა განაცხადა, რომ ასეთად ირაკლი დოლაბერიძე მიაჩნია, რომელსაც დღესდღეობით სპორტისა და ახალგაზრობის საქმეთა სამინისტროს სპორტის დეპარტამენტის უფროსის პოსტი უკავია.
“თუ გათვალისწინებული იქნება ეს კანდიდატურა, ქართულ სპორტს ნამდვილად წაადგება. მას დიდი გამოცდილება აქვს. შეიძლება პირდაპირ ითქვას, რომ ის სპორტის კაცია. შესაბამისი განათლებაც გააჩნია და ის წლების მანძილზე ემსახურება ქართულ სპორტს. ეს ადამიანი ნამდვილად იქნება სპორტისა და ახალგაზრდობის საქმეთა ღირსეული მინისტრი.
ეს გახლავთ ირაკლი დოლაბერიძე, რომელიც მართლაც პრინციპული, საკუთარი საქმის მცოდნე პიროვნებაა. ის მთელი წლების განმავლობაში იბრძოდა. სწორედ მისი დამსახურებაა 2007 წელს გაუქმებული სპორტის აკადემიის აღდგენა. ამ ადამიანის ძალისხმევით ეს ჩვენ შევინარჩუნეთ, ქართულმა სპორტმა შეინარჩუნა ახლა უკვე უმაღლეს რანგში აყვანილი სპორტის უნივერსიტეტი”, – განაცხადა შოთა ხაბარელმა TVS-ის ეთერში.
შეგახსენებთ, რომ დღეს ლევან ყიფიანმა სპორტისა და ახალგაზრდობის საქმეთა მინისტრის პოსტი დატოვა.
