“სამპდორიას” საქმეს იძიებენ, “ინტერს” ევროპის ლიგაზე თამაშის შანსი გაუჩნდა

ავტორიტეტული იტალიური გამოცემა “ლა გაძეტა დელო სპორტი” იუწყება, რომ “სამპდორიას” გარიგებულ მატჩში მონაწილეობის გამო დასჯიან.

ეჭვი სერია A-ს ეგიდით 2011 წლის 23 აპრილს “ბარის” წინააღმდეგ გამართულ შეხვედრაზეა (1:0). შესაძლოა, კლუბს იტალიის ჩემპიონატის 2014/15 წლების გათამაშების სატურინირო ცხრილში ქულები ჩამოაკლონ.

თუ ასე მოხდება, ევროპის ლიგაზე გენუელთა ნაცვლად მილანის “ინტერი” ითამაშებს, რომელმაც მერვე პოზიცია დაიკავა.

ჯერ საბოლოო ვერდიქტი არ გამოუტანიათ, თუმცა იტალიის ფეხბურთის ფედერაციამ უეფაში უკვე შეიტანა განაცხადი ევროთასებზე მონაწილე კლუბთა შემადგენლობის ცვლილების თაობაზე. “სამპდორიას” ერთთვიანი ვადა ეძლევა სპორტულ სასამართლოში განაჩენის გასაჩივრებისთვის.

“სამპდორია” (ან “ინტერი”) ტურნირს მესამე საკვალიფიკაციო ეტაპიდან უნდა შეუერთდეს, რომელიც 30 ივლისს იწყება.