დვალის პირველი კომენტარი „საბურთალოში“ გადასვლის შემდეგ

როგორც მოგახსენეთ, „საბურთალომ“ გამოცდილი ქართველი თავდამსხმელის ჯაბა დვალის ტრანსფერი დაადასტურა. ამასთან დაკავშრებით კლუბის ახალწვეული „საბურტალოელთა“ ოფიციალურ საიტს გაესაუბრა.

„დაახლოებით ერთი თვეა, რაც “საბურთალოში” ვვარჯიშობ. შთაბეჭდილებები დადებითი და სასიამოვნოა – ძალიან მეგობრული გუნდია, როგორც მინდორზე, ასევე მინდორს გარეთ. ეს ფაქტორი, რა თქმა უნდა მნიშვნელოვანია და წარმატებაში დიდი როლის შეტანა შეუძლია. კლუბში ისეთი განწყობაა, რომ გიხარია ადამიანს ვარჯიში, თამაში… ძალიან იოლად შევეწყვე “საბურთალოს” და მოხარული ვარ, რომ თბილისურ კლუბში გავაგრძელებ კარიერას.

ამ გადაწყვეტილებაში დიდი როლი ითამაშა მთავარი მწვრთნელის ფაქტორმა – გიორგი ჭიაბრიშვილთან “ზესტაფონში” თამაშისას მიმუშავია. აქედან გამომდინარე ვიცი როგორი სტილის ფეხბურთის მიმდევარია, როგორია მისდამი დამოკიდებულება. სიმართლე გითხრათ, მინდოდა მასთან კიდევ მემუშავა, რადგანაც ძალიან საინტერესო ვარჯიშები აქვს, კარგად აანალიზებს თამაშებს, სწორად მიაქვს ფეხბურთელემდე თავის სათქმელი.

პირველი და უმაღლესი ლიგა განსხვავდება ერთმანეთისგან, მაგრამ წარმატებით ასპარეზობის რესურსი ნამდვილად გაგვაჩნია. კლუბში ნიჭიერი ფეხბურთელები თამაშობენ, 17-18-19 წლის ფეხბურთელები პატარები უკვე აღარ არიან. მართალია, უმაღლეს ლიგაში დებიუტი გვექნება, მაგრამ მჯერა მაღალი მიზნებისთვის ვიბრძოლებთ, არც ჩემპიონობა უნდა გამოვრიცხოთ, რადგან არავისზე ნაკლებები არა ვართ. გასვლით თამაშებში ბევრად მეტი სირთულეები შეგვხვდება, მაგრამ ამისთვისაც მზად ვართ.

დუშეთში საფუძვლიანად ვემზადებით, ორჯერად ვარჯიშებზე ვართ გადასულები და იმედია ჩემპიონატის სტარტზე სასურველ სპორტულ ფორმაში ვიქნებით“, – ციტირებს დვალს fcsaburtalo.ge