“ოლდ ტრაფორდზე” პანიკაა. პედრომ “ჩელსი” აირჩია
ესპანელი თავდამსხმელის სატრანსფერო საგა დასასრულს უახლოვდება.
მოგეხსენებათ, დიდი ხანია, რაც ბრიტანულმა პრესამ პედრო როდრიგესის ტრანსფერი “მანჩესტერ იუნაიტედში” ფაქტობრივად უკვე გადაწყვეტილად გამოაცხადა. მოსალოდნელი იყო, რომ ესპანეთის სუპერ თასის შემდეგ პედრო მანჩესტერში გაემგზავრებოდა და საბოლოო პროცედურებს მოაგვარებდა.
თუმცა, დღეს სიტუაცია შეიცვალა. ლონდონის “ჩელსის” ხელმძღვანელობამ “წითელი ეშმაკების” შეთავაზება გადაფარა და ახლა როდრიგესს ინგლისის დედაქალაქში სამედიცინო შემოწმების გასავლელად ელოდებიან. სავარაუდოდ, “არისტოკრატებმა” ტრანსფერი დღეს ოფიციალურად უნდა დაადასტურონ.
პედროს გაყიდვის სანაცვლოდ კატალონიელები ლონდონელებისგან 28 მილიონ ევროს მიიღებენ და ამ თანხას კიდევ ორი მილიონი იმ შემთხვევაში დაემატება, თუ ესპანელი თავის ახალ კლუბთან ერთად გარკვეულ წარმატებას მიაღწევს.
ამგვარად, პედრო “ჩელსის” შემადგენლობაში მეოთხე ესპანელი მოთამაშე გახდება, სეზარ ასპილიკუეტასთან, სესკ ფაბრეგასთან და დიეგო კოშტასთან ერთად.
