„გურია“ სპეციალურ განცხადებას ავრცელებს
საფეხბურთო კლუბმა „გურიამ“ თავის ოფიციალურ გვერდზე ბოლო დროს განვითარებულ მოვლენებთან დაკავშირებით სპეციალური განცხადება გამოაქვეყნა.
„ბოლო დროს სისტემატური ხასიათი მიიღო საფეხბურთო კლუბ „გურიასა“ და მისი პრეზიდენტის, ზაზა ურუშაძის წინააღმდეგ ცილიმწამებლურმა კომპანიამ. ამჯერად კლუბის ლიცენზირების ყოფილი მენეჯერი ეკა ვადაჭკორია ბრალს გვდებს, თითქოს ჩვენ სპეციალურად უარი ვთქვით ლიცენზირების პირობების შესრულებაზე, რის გამოც დავჯარიმდით.
ზოგადად ასეთ აბსურდზე კომენტარს არ ვაკეთებთ, მაგრამ ქალბატონ ეკას შევახსენებთ, რომ ლიცენზია არ მიგვიღია მაშინაც, როცა ის იყო ლიცენზირების მენეჯერი. მეტიც _ „გურიას“ ლიცენზია არასდროს მიუღია.
ეს არ არის კლუბის დირექტორატის ბრალი და მით უმეტეს, არანაირად „გურიას“ პრეზიდენტ ზაზა ურუშაძის, ვინც კლუბს ყველანაირად გვერდში უდგას, თუმც არ აქვს შეხება არც ფინანსურ და არც სალიცენზიო საკითხებთან. არც ლიცენზირების ყოფილ თუ მოქმედ მენეჯერებს ვადანაშაულებთ ამაში _ ვინ ვინ და ქალბატონმა ეკამ კარგად იცის, რომ „გურიას“ ჰქონდა გადმომავალი ფინანსური დავალიანება, რომელსაც კლუბი ეტაპობრივად ისტუმრებს.
სწორედ ეს დავალიანება, ანუ გაუსტუმრებელი ვალდებულებები არის მთავარი მიზეზი, რის გამოც ლიცენზია ვერ მივიღეთ და არა აუდიტის მოწვევაზე თითქოსდა ჩვენი უარი, რასაც ადგილი არ ჰქონია _ კლუბს აუდიტი მოწვეული ჰყავდა!
ერთსაც დავამატებთ: ზაზა ურუშაძეს არანაირი სამსახურებრივი შეხება არ ჰქონია ლიცენზირების მენეჯერთან. შესაბამისად, მას ვერც დასტურს ეტყოდა და ვერც უარს აუდიტის მოწვევაზე. ქალბატონი ეკა თავის თავსაც ეწინააღმდეგება _ ჩემი წასვლის შემდეგ აღარ დარჩა აუდიტისთვის საბუთების მიმცემი პირიო, როცა მისივე თქმით, თურმე აუდიტზე უარი ვთქვით.
დასასრულ, დავძენთ, რომ „გურია“ აპირებს სარჩელის შეტანას იმ პირების წინაააღმდეგ, ვინც მიზანმიმართულ ცილიმწამებლურ კამპანიას ეწევა“, – ნათქვამია განცხადებაში.
