რას აცხადებდა ზურაბ ხიზანიშვილი შოტლანდიის ნაკრებთან მატჩამდე
4 სექტემბერს, საქართველოს ეროვნულმა ნაკრებმა “დინამო არენაზე” შოტლანდიის ნაკრები მიიღო და მეტოქე ანგარიშით 1:0 დაამარცხა.
მატჩამდე, “ჯვაროსანთა” გამოცდილმა ფეხბურთელმა ზურაბ ხიზანიშვილმა საკმაოდ საინტერესო განცხადება გააკეთა. მისი თქმით, ცხადაძემ ეს მატჩი უკვე მოიგო. როგორც ჩანს, ხიზანიშვილი მართალი აღმოჩნდა.
“მთავარ მწვრთნელს ეტყობა, რომ ამ მატჩისათვის მაქსიმალურად კარგად ემზადება და გადაჭარბებული თუ არ გამომივა, რასაც ვატყვობ, ვფიქრობ, რომ ეს თამაში კახამ უკვე მოიგო.
სანაკრებო და საკლუბო დონეზე ბევრი მნიშვნელოვანი თამაში ჩავატარე და გამოცდილებით ვხვდები, რა მომენტში გრძნობს მწვრთნელიც და ფეხბურთელიც, რომ კონკრეტულ თამაშში წარმატების მიღწევა შეუძლიათ.
ახლას სწორედ ასეთი მომენტია და მიმაჩნია, რომ წარმატებით თამაში შეგვიძლია. რაც ყველაზე მნიშვნელოვანია, ცხადაძეს სურს, რომ წარმატებას კარგი ფეხბურთის თამაშით და შემტევი სტილით მივაღწიოთ, რაშიც ფეხბურთელებიც ვეთანხმებით,” ვკითხულობთ საქართველო-შოტლანდიის მატჩის პროგრამაში.
