ევრობასკეტზე სატურნირო ცხრილები აიმღვრა

ევრობასკეტზე 2 ჯგუფი ისვენებდა, ხოლო ორ ჯგუფში მესამე ტურის მატჩები გაიმართა და რამდენიმე სენსაციური შედეგიც დაფიქსირდა.

დავიწყოთ დ ჯგუფით: ყველაზე ხმაურიანად ბელგიელთა გამარჯვება უნდა მივიჩნიოთ ლიტვასთან. ბენილუქსელებმა 76:74 დაამარცხეს მეტოქე და ბალტიისპირელებს ჯგუფში პირველ ადგილზე გასვლა სათუო გაუხადეს.

სხვა ადგილი კი ლიტველებს შემდეგ ეტაპზე ძლიერ მეტოქესთან „აჯახებს“, რაც მათთვის სასურველი ვარიანტი არ უნდა იყოს.

ამავე ჯგუფში ესტონეთმა 78:71 მოუგო უკრაინას. ესეც სენსაციური შედეგია.

ლატვიამ 72:65 დაამარხა ჩეხეთი და ახლა ჯგუფში პირველ ოთხეულს თანაბარი ქულები დაუგროვდა.

სატურნირო ცხრილი:

1.ჩეხეთი 3 2 1 223:193 5

2.ბელგია 3 2 1 227:207 5

3.ლიტვა 3 2 1 211:193 5

4.ლატვია 3 2 1 199:200 5

5.ესტონეთი 3 1 2 190:235 4

6.უკრაინა 3 0 3 203:225 3

ა ჯგუფში ბოსნიაც აუტსაიდერად ითვლებოდა ისრაელთან, მაგრამ დამატებით დროში 86:84 მოუგო და საქმე გაურთულა, ხოლო თავად შემდეგ ეტაპზე გასვლის შანსი გამოიკეთა.

ბოსნიელთა მოგება შესაძლოა, წაადგეს რუსეთსაც, რომელმაც ზედიზედ მესამე მარცხი განიცადა, ამჯერად, ფინელებისგან. დაძაბულ ბრძოლა სკანდინავიელებმა 81:79 იმარჯვეს.

საფრანგეთმა კი პოლონეთს 69:66 მოუგო და ერთპიროვნულად ლიდერობს ჯგუფს.

სატურნურო ცხრილი:

1.საფრანგეთი 3 3 0 247:207 6

2.ისრაელი 3 2 1 239:225 5

3.პოლონეთი 3 2 1 216:212 5

4.ფინეთი 3 1 2 234:255 4

5.ბოსნია 3 1 2 204:233 4

6.რუსეთი 3 0 3 231:239 3