შოტლანდიამ ალუბლები დესერტად მიირთვა

რაგბის მსოფლიოს თასზე დაიწყო მეორე ტური და პირველ მატჩში ერთმანეთს შოტლანდიისა და იაპონიის ნაკრებები შეხვდნენ.

პირველი ტურის ყველაზე დიდი სენსაციის ავტორმა „ალუბლებმა“ სქოთებს მხოლოდ 45 წუთი გაუძლეს, შემდეგ კი 5 ლელო მიიღეს და უშანსოდ წააგეს.

იაპონელები პირველ ტაიმში წინაც იყვნენ: ლადილოუს ორ ჯარიმას მაფის ლელო და გორომარუს ჯარიმით უპასუხეს და 7:6 დაწინაურდნენ. თუმცა იმავე ლედილოუმ კიდევ ორი ჯარიმა გაიტანა და სქოტებმა ტაიმი 12:7 მოიგეს.

მეორე ტაიმის დასაწყისში გორომარუმ ჯარიმით კი შეამცირა სხვაობა, მაგრამ შემდეგ შოტლანდიელებმა გაილაღეს. ჰარდიმ, ბენეტმა (2), სეიმურმა და რასელმა 5 ლალო გაიტანეს, რასაც 4 გარდასახვა მიაყოლეს და 45:10 მოიგეს.