დავით ზირაქიშვილი: მსოფლიო თასზე ერთი მატჩის მოსაგებად არ ჩამოვსულვართ
საქართველოს მორაგბეთა ნაკრებს კიდევ ორი მატჩი დარჩა ჩასატარებელი მსოფლიო თასზე. გუნდის პერსპექტივებზე საუბრობს დავით ზირაქიშივილი:
– დარჩენილ ორ შეხვედრაში რას უნდა ელოდოს გულშემატკივარი?
– არ მინდა პროგნოზების გაკეთება, მაგრამ ჩვენ აქ მხოლოდ ერთი მატჩის მოსაგებად არ ჩამოვსულვართ. ყველა თამაშზე მოსაგებად გავდივართ. ჩვენი შერკინების სიძლიერეში დარწმუნებული ვარ და მსოფლიო თასი ჩვენთვის ამით არ დასრულებულა.
– ახალი ზელანდიის წინააღმდეგ რა განწყობით გახვალთ?
– მეოცნებეები არ ვართ, რეალისტები ვართ. ვიცოდით, რომ არგენტინა ძლიერი გუნდი იყო და არც ახალი ზელანდიის წინააღმდეგ გასამართ მატჩზე ვაგებთ ოცნების კოშკებს, თუმცა მოლოდინები მაინც დიდი გვაქვს. ამ გამოწვევას კარგად გამოვიყენებთ და მოედანზე ყველაფერს დავდებთ.
– არგენტინასთან მატჩში დადებითი დაინახეთ რამე?
– წაგებულ თამაშში დადებითის დანახვა რთულია, მაგრამ შემიძლია ვთქვა, რომ ჩვენი შერკინება ძალიან კარგი იყო და ოთხჯერ დავაჯარიმეთ მოწინააღმდეგე. არგენტინას ჩვენთან შერკინებაში დადგომა უჭირდა და ამით ბევრი გუნდი ვერ დაიკვეხნის. ჩვენს თამაშს კიდევ შევაფასებთ და ვიდეოანალიზი საშუალებას მოგვცემს კარგი და ცუდი მხარეები დავინახოთ.
