ვლადიმირ ვაისმა შემადგენლობა დაასახელა
საქართველოს ეროვნული ნაკრების მთავარმა მწვრთნელმა ვლადიმირ ვაისმა 25-კაციანი შემადგენლობა დაასახელა. ჩვენი ეროვნული გუნდი 24 მაისს შეკრებაზე ავსტრიაში გაემგზავრება და ლინცთან ახლოს დაბინავდება. 27 მაისს საქართველოს ნაკრები ქალაქ ველსში სლოვაკეთს გაეჯიბრება, 3 ივნისს ბუქარესტში რუმინეთის ნაკრებთან ჩაატარებს ამხანაგურ მატჩს, 7 ივნისს კი მადრიდში ესპანეთს შეხვდება. სამივე მეტოქე ევრო-2016-ის ფინალური ეტაპისთვის ემზადება.
ვლადიმირ ვაისმა ნაკრებში სამ ახალწვეულს უხმო: ჩეხური „ტეპლიცეს“ მცველი, აშშ-ში დაბადებული ქართველი ზურაბ ცისკარიძე პირველად მოირგებს ისტორიული სამშობლოს ეროვნული გუნდის მაისურს. პირველად გამოიძახეს თბილისის „დინამოს“ ნახევარმცველებიც: ჯაბა ჯიღაური და ვახტანგ ჭანტურიშვილი.
ვაისი ტრავმის გამო ვერ დაიხმარს რუსული „კრილია სოვეტოვის“ მეკარეს გიორგი ლორიას, რაც შეეხებათ ესპანური „ხიმნასტიკის“ ნახევარმცველ გიორგი აბურჯანიას და გერმანული „დუისბურგის“ შემტევ გიორგი ჭანტურიას, მათ კლუბებს უმნიშვნელოვანესი მატჩები უწევთ და ფედერაციასთან შეთანხმებით, სლოვაკეთთან მატჩის შემდეგ შეუერთდებიან ნაკრებს.
მეკარეები: ნუკრი რევიშვილი (მორდოვია, რუსეთი), გიორგი მაკარიძე (ფეირენსე, პორტუგალია), როინ კვასხვაძე (ტორპედო);
მცველები: გურამ კაშია (ვიტესი, ჰოლანდია), სოლომონ კვერკველია (რუბინი, რუსეთი), ალექსანდრე ამისულაშვილი (დინამო), ლაშა დვალი (სლასკი, პოლონეთი), ოთარ კაკაბაძე (დინამო თბ), უჩა ლობჟანიძე (დინამო თბ), გიორგი ნავალოვსკი (სკა-ენერგია, რუსეთი), ზურაბ ცისკარიძე (ტეპლიცე, ჩეხეთი);
ნახევარმცველები: ჯაბა კანკავა (რეიმსი, საფრანგეთი), ნიკა კვეკვესკირი (ინტერი, აზერბაიჯანი), გიორგი აბურჯანია (ხიმნასტიკი, ესპანეთი), ლევან ყენია (სლავია, ჩეხეთი), ჯანო ანანიძე (სპარტაკი, რუსეთი), ალექსანდრე კობახიძე (დნიპრო, უკრაინა), ვალერი ყაზაიშვილი (ვიტესი, ჰოლანდია), თორნიკე ოქრიაშვილი (ესკიშეჰირსპორი, თურქეთი), ჯაბა ჯიღაური (დინამო თბ), ვახტანგ ჭანტურიშვილი (დინამო თბ);
თავდამსხმელები: ლევან მჭედლიძე (ემპოლი, იტალია), ვლადიმერ დვალიშვილი (პოგონი, პოლონეთი), გიორგი ქვილითაია (დინამო თბ), გიორგი ჭანტურია (დუისბურგი, გერმანია).
ჟურნალისტთა საყურადღებოდ: 21 მაისს, 15 საათზე, სასტუმრო „ჰუალინგში“ საქართველოს ეროვნული ნაკრების მთავარი მწვრთნელი ვლადიმირ ვაისი პრესკონფერენციას გამართავს.
სფფ-ს პრესსამსახური
