გერმანიის ნაკრებმა სლოვაკეთი უპრობლემოდ დაამარცხა (ვიდეო)
ლილის “პიერ მორუაზე” გერმანიისა და სლოვაკეთის ნაკრებებს შორის 2016 წლის ევროპის ჩემპიონატის მერვედფინალური ეტაპის შეხვედრა ჩატარდა. მატჩის უპირობო ფავორიტად “ბუნდესთიმი” სახელდებოდა და სწორედ იოახიმ ლიოვის გუნდი ფლობდა სათამაშო უპირატესობას. გერმანელებმა სწრაფი გოლის გატანა შეძლეს: მე-8 წუთზე სლოვაკთა საჯარიმოდან გადმოვარდნილ ბურთს ჯერომ ბოატენგი შეეგება და შეუჩერებელი დარტყმით მეკარისგან მარჯვენა დაბალ კუთხეში ეფექტური გოლი გაიტანა. ზუსტად ხუთ წუთში გერმანელებს უპირატესობის გაზრდის კარგი შანსი მიეცათ: მარტინ შკრტელმა საკუთარ საჯარიმო მოედანზე მარიო გომესს ხელი უბიძგა და მთავარმა არბიტრმა თერთმეტმეტრიანი დარტყმა დანიშნა. პენალტი მესუთ იოზილმა ცუდად შეასრულა, მისი დარტყმული მეკარე მატუშ კოზაჩიკმა მოიგერია. ტაიმის დასრულებამდე ორი წუთით ადრე გერმანიის ნაკრებმა მეორე გოლი მაინც გაიტანა: იულიან დრაქსლერი მეტოქის საჯარიმო მოედანზე მარცხენა ფლანგიდან შეიჭრა და ბურთი კარის წინ მდგარ გომესს გადააწოდა, ამ უკანასკნელმა ერთი შეხებით დაარტყა და გაიტანა – 2:0. სლოვაკებს მატჩის პირველ ნახევარში მხოლოდ ერთი მომენტი ჰქონდათ, როდესაც იურაი კუცკამ თავით დაარტყა, თუმცა მანუელ ნოიერმა ნახტომში ბურთის მოგერიება მოახერხა.
მატჩის მეორე ტაიმში გერმანელებმა ტერიტორიული უპირატესობა სლოვაკებს დაუთმეს, თუმცა იან კოზაკის გუნდს რეალურ სახიფათო მომენტამდე საქმე ვერ მიჰყავდა. სამაგიეროდ, გერმანიის ნაკრებმა გამოიყენა შანსი და უპირატესობა კიდევ უფრო გაზარდა: გოლი კუთხურს მოყვა, სლოვაკებმა დრაქსლერი უყურადღებოდ დატოვეს და მანაც ეფექტური დარტყმით მესამედ შეარხია კოზაჩიკის კარის ბადე. საბოლოო ჯამში, გერმანიის ნაკრებმა სლოვაკეთი უპრობლემოდ, ანგარიშით 3:0 დაამარცხა.
ევრო-2016
მერვედფინალი
გერმანია — სლოვაკეთი 3:0 (2:0)
საფრანგეთი: ნოიერი; კიმიხი, ბოატენგი (ჰიოვედესი 72′), ჰუმელსი, ჰეკტორი; კროოსი, ხედირა (შვაინშტაიგერი 76′); მიულერი, იოზილი, დრაქსლერი (პოდოლსკი 72′); გომესი.
მთავარი მწვრთნელი: იოახიმ ლიოვი.
ირლანდია: კოზაჩიკი; პეკარიკი, შკრტელი, დურიცა, დიომბერი (სალატა 84′); გროშოვსკი; შკრინიარი, ჰამშიკი, კუცკა, ვაისი (გრეგუში 46′); დურიში (შესკატი 64′).
მთავარი მწვრთნელი: იან კოზაკი.
გოლები: ბოატენგი 8′, გომესი 43′, დრაქსლერი 63′.
გაფრთხილებები: კიმიხი 46′, ჰუმელსი 67′ — შკრტელი 13′, კუცკა 90+1′.
გამოუყენებელი პენალტი: იოზილი 13′.
მთავარი მსაჯი: შიმონ მარცინიაკი (პოლონეთი).
