მატერაცი ზიდანთან ინციდენტზე: “მე მისი და მოვიხსენიე და არა – დედა”
იტალიის ნაკრების ყოფილმა მცველმა მარკო მატერაციმ ავტობიოგრაფიული წიგნი გამოსცა, რომელშიც იგი 2006 წლის მსოფლიოს ჩემპიონატის ფინალურ მატჩში მომხდარ ინციდენტს იხსენებს, როდესაც საფრანგეთის ნაკრების ექს-ნახევარმცველმა ზინედინ ზიდანმა მას მკერდში თავი აძგერა.
“მე მაშინ მისი და მოვიხსენიე და არა – დედა.
ამ წიგნის დაწერა იმიტომ გადავწყვიტე, რომ დღემდე ყველა მეკითხება, ისეთი რა ვუთხარი ზიდანს, რომ მას ამგვარი რეაქცია ჰქონდა. ნამდვილად სისულელე ვუთხარი, თუმცა ჩემი ეს სიტყვები ასეთ რეაქციას არ იმსახურებდა. ნებისმიერ ქალაქში – რომში, ნეაპოლში, ტურინში, მილანში თუ პარიზში ამაზე უარესს სიტყვებს გაიგებთ.
ვერ გამიგია, რატომ გამოიწვია ამ ინციდენტმა ასეთი რეზონანსი. ერთადერთი რამ, რაც მინდა, რომ იმ დღიდან მახსოვდეს, ჩემი გოლია. ხანდახან იტალიაში ფანები მაჩერებენ და მეუბნებიან, რომ კარგად მოვიქეცი, როდესაც ზიდანს ასეთი რამის გაკეთება ვაიძულე. ვღიზიანდები, როდესაც ამას ამბობენ, რადგან, საბოლოო ჯამში, მსხვერპლი მე გამოვდექი”, – აღნიშნავს მატერაცი.
