ზლატკო კრანჩარი: “თბილისის “დინამოს” შეცდომას დაველოდებით”

ზაგრების “დინამოს” მთავარმა მწვრთნელმა, ზლატკო კრანჩარმა თბილისის “დინამოსთან” გასამართი მატჩის წინ პრესკონფერენცია გამართა და ჟურნალისტების კითხვებს უპასუხა.

“ხვალ რთულ მატჩს ველით, თუმცა შევეცდებით, მომდევნო ეტაპზე გავიდეთ. გვინდა, რომ კარგად ვითამაშოთ. ჩვენი მიზანი ჩემპიონთა ლიგის ფლეი-ოფში მოხვედრაა.

თბილისის “დინამომ” პირველ შეხვედრაში დაგვანახა, რომ მაღალი დონის გუნდია. კონკრეტულად რომელიმე ფეხბურთელს ვერ გამოვარჩევდი. ანგარიში ჩვენ გვაძლევს უპირატესობას, ამიტომ სწრაფ გოლზე აქცენტს არ ვაკეთებთ. მასპინძლების შეცდომას დაველოდებით და შევეცდებით, ის გამოვიყენოთ.

პრესკონფერენციაზე ჩვენს ტაქტიკასთან დაკავშირებით ვერ ვისაუბრებთ, ყველაფერს მოედანზე ვნახავთ. გუნდი მობილიზებულია და ხვალინდელი მატჩისათვის მზად ვართ.

ჩემპიონატის ბოლო ტურის მატჩში გამარჯვება გვინდოდა, მაგრამ რამდენიმე ფეხბურთელი დავასვენეთ, რათა მათ ხვალ ეთამაშათ.”