უეფას პრეზიდენტის ვიზიტი საქართველოს ფეხბურთის ფედერაციაში
ალექსანდერ ჩეფერინი საქართველოში ვიზიტის ფარგლებში პირველად ფეხბურთის ფედერაციას ესტუმრა, სადაც ის სფფ-ის ხელმძღვანელებს შეხვდა.
შეხვედრის მთავარი თემა ის პროექტები იყო, რაც ფეხბურთის ფედერაციაში უკანასკნელი 1 წლის განმავლობაში განხორციელდა. მხარეებმა ასევე ფეხბურთის განვითარებისათვის აუცილებელი მიმართულებები განიხილეს, მათ შორის ინფრასტრუქტურულ პროექტებზე ისაუბრეს და საქართველოში ფეხბურთის მასობრიობის ზრდაზე გაამახვილეს ყურადღება. შეხვედრის ერთ-ერთი თემა 2017 წელს დაგეგმილი ევროპის 19-წლამდე ჩემპიონატი იყო.
„ ჩვენ გვჯერა ლევანის და მისი გუნდის, ისინი ბევრს შრომობენ, რაც ნამდვილად არ არის ადვილი. ჩვენთვის მნიშვნელოვანია, რომ ვაჩვენოთ, რომ ჩვენ მხარში ვუდგავართ არჩეულ ხელმძღვანელობას, რომელიც ცდილობს ფეხბურთის სასარგებლოდ იმოქმედოს,“- განაცხადა უეფას პრეზიდენტმა ალექსანდერ ჩეფერინმა.
„უპირველესად მადლობას ვუხდი უეფას პრეზიდენტს იმისათვის, რომ სწორედ საქართველოა პირველი ქვეყანა, რომელსაც ალექსანდერ ჩეფერინი უეფას პრეზიდენტად არჩევის შემდეგ პირველი ოფიციალური ვიზიტით ესტუმრა. ბოლო პერიოდის მანძილზე ჩვენ რამდენჯერმე შევხვდით მას, გავეცანით მის ხედვას, რომელსაც ჩვენც ვიზიარებთ და არჩევნებამდე რამდენიმე დღით ადრე ღიად გამოვუცხადეთ მხარდაჭერა. დარწმუნებულები ვართ, რომ ჩვენი თანამშრომლობა იქნება ნაყოფიერი და მოხარულები ვართ, რომ ჩვენ უეფას მხარდაჭერა გვაქვს,“- განაცხადა სფფ-ის პრეზიდენტმა ლევან კობიაშვილმა.
GFF.GE
