კონტე: “პრემიერ ლიგის მოსაგებად, დღევანდელის ჩათვლით, კიდევ 29 ქულა გვჭირდება”
პრემიერ ლიგის 26-ე ტურში ლონდონის “ჩელსი” “სუონსი სიტის” დაუპირისპირდა და მეტოქე, ანგარიშით, 3-1 დაამარცხა. ლონდონელთა მხრიდან სესკ ფაბრეგასი, პედრო როდრიგესი და დიეგო კოშტა გამოირჩნენ. ერთი გოლის გაქვითვა ფერნანდო ლორენტემ მოახერხა.
მატჩის შემდეგ ჟურნალისტებთან “არისტოკრატების” მთავარმა მწვრთნელმა, ანტონიო კონტემ ისაუბრა.
“11 ქულით ვართ წინ, თუმცა ეს “სუფთა” 11 ქულა არაა. სხვა გუნდებს ჯერ თავიანთი შეხვედრები არ ჩაუტარებიათ. თუ ნებისმიერ მათგანს ინგლისის ჩემპიონატის მოგება უნდა, დარჩენილ შეხვედრებში ქულათა მაქსიმუმი უნდა მოიპოვოს. იმავეს ვიტყვი ჩვენზე… პრემიერ ლიგის თასის აღსამართად, ბოლო მოგებული თამაშის ჩათვლით, 29 ქულაა საჭირო.”
“ჯერ კიდევ ბევრი დაპირისპირებაა დარჩენილი. საჭიროა, არ მოვუდნდეთ და თითოეულ მატჩზე ბოლომდე მოვახდინოთ კონცენტრირება. ამას მუდამ ვუმეორებ ჩემს ფეხბურთელებს. თუ ისინი ამ ყველაფერს შეძლებენ, ნამდვილად დაიმსახურებენ პრემიერ ლიგის ტიტულის მოგებას.”
“სუონსისთან” შეხვედრაში უპირატესობა გვქონდა. არ მახსოვს, მეტოქეს რეალური მომენტი შეექმნას. კარგად ვითამაშეთ და ბევრი კარგი შანსიც გვქონდა,” – განაცხადა იტალიელმა სპეციალისტმა.
