რას ნანობს ფერგიუსონი ჩემპიონთა ლიგის 2008 წლის ფინალის შემდეგ

“მანჩესტერ იუნაიტედის” ყოფილი მთავარი მწვრთნელი სერ ალექს ფერგიუსონი გამოტყდა, რომ ჩემპიონთა ლიგის 2007-2008 წლების გათამაშების ფინალურ მატჩში პარკ ჯი სუნის განაცხადს მიღმა დატოვება ინანა.

“მაშინ საკმაოდ კარგი ფეხბურთელები გვყავდნენ, ნამდვილი მებრძოლები და პროფესიონალები. ჩემპიონთა ლიგის 2008 წლის გათამაშებაზე ლონდონის “ჩელსისთან” გამართული ფინალური მატჩი მახსოვს და დღემდე ვნანობ, რომ პარკ ჯი სუნი განაცხადში არ შევიყვანე. ყოველთვის უსიამოვნოა, როდესაც ფეხბურთელს ფინალურ შეხვედრაში მოედანზე გასვლის შანსიც კი არ აქვს.

ორი წლის შემდეგ ასე მოვექეცი დიმიტარ ბერბატოვსაც და ეწყინა. იგი ამას არ იმსახურებდა. ფინალური მატჩის ტრიბუნიდან ყურებას არცერთი ფეხბურთელი არ იმსახურებს”, – ციტირებს ფერგიუსონის სიტყვებს “ინდეპენდენტი”.