დღის მთავარი სატრანსფერო ამბები – 29 მაისი
“სტოკი” რუნის სანაცვლოდ 52 მილიონს იხდის
“სტოკ სიტი” უეინ რუნის ირგვლივ შექმნილი ვითარებით სარგებლობას აპირებს.
“მირორის” ცნობით, საბუქმეიქერო კანტორა Bet365, რომელიც “სტოკის” გენერალური სპონსორი გახლავთ, მზად არის, გუნდს რუნის კონტრაქტის გამოსყიდვაში დაეხმაროს. “მეთუნეები” 31 ინგლისელი ფეხბურთელის შეძენას 52 მილიონ ევროდ აპირებენ.
თავად უეინ რუნიმ განაცხადა, რომ “ევერტონისა” და “მანჩესტერ იუნაიტედის” გარდა სხვა ინგლისური კლუბის ფორმას არასდროს ჩაიცვამს. მისი ჯამაგირი კვირაში 343 ათას ევროს შეადგენს და ინგლისის პრემიერლიგის ყველაზე მაღალანაზღაურებადი ფეხბურთელია. რუნისა და “მანცესტერ იუნაიტედს” შორის გაფორმებული შრომითი ხელშეკრულება 2019 წლის 30 ივნისამდეა ძალაში.
ჟერემი მატიე “ბარსელონას” ტოვებს
ჟერემი მატიე “ბარსელონას” დატოვებს. ამის შესახებ ფრანგმა ფეხბურთელმა ესპანეთის თასის ფინალური მატჩის შემდეგ თანაგუნდელებს აცნობა.
“ბარსელონაში” მატიეს თამაშით კმაყოფილნი არ არიან. ჩემპიონთა ლიგის მეოთხედფინალურ ეტაპზე ტურინის “იუვენტუსთან” ჩატარებული პირველი მატჩის (0:3) შემდეგ 33 წლის ფრანგი ფეხბურთელი მოედანზე აღარ გამოსულა.
პრესაში გავრცელებული ინფორმაციის თანახმად, ჟერემი მატიე ორი კლუბის წინადადებას განიხილავს.
ნოლიტოს “მანჩესტერ სიტის” დატოვება სურს
“მანჩესტერ სიტის” შემტევი, ნოლიტო აცხადებს, რომ მას გუნდის დატოვება სურს. ესპანელი ფეხბურთელი “ქალაქელთა” რიგებში 2016 წელს ჩაირიცხა, როდესაც მან კლუბთან ოთხწლიანი კონტრაქტი გააფორმა.
“ესპანეთში დაბრუნება ძალიან მსურს. იმედი მაქვს, რომ “მანჩესტერ სიტის” დავტოვებ. მნიშვნელობა არ აქვს, იჯარით წავალ თუ სრული ტრანსფერით. ჩემი შეძენის სურვილი “ატლეტიკოსა” და “სელტასაც” აქვთ, თუმცა ეს უკვე აგენტის საქმეა”, – უთხრა ნოლიტომ Cope-ს.
ჩიჩარიტო “ლიონში”?
“ლიონმა” ლევერკუზენის “ბაიერს” ხავიერ ერნანდესის თაობაზე წინადადებით მიმართა. ფრანგულმა კლუბმა გერმანელებს 12 მილიონი ევრო შეთავაზა.
“ლიონი” ლაკაზეტის შემცვლელს ეძებს, ჩიჩარიტო კი ერთ-ერთი კანდიდატია.
“მანჩესტერ სიტი” მბაპეში რეკორდულ თანხას იხდის
Telefoot-ის ცნობით, “მანჩესტერ სიტი” “მონაკოს” კილიან მბაპეში 130 მილიონ ევროს სთავაზობს.
18 წლის თავდამსხმელმა შესანიშნავი სეზონი ჩაატარა, რის შემდეგაც მისით არაერთი კლუბი დაინტერესდა.
