ანალიზი: სჭირდება “მანჩესტერ იუნაიტედს” ივან პერიშიჩი?
“მანჩესტერ იუნაიტედსა” და “ინტერს” შორის მიმდინარე მოლაპარაკებები ივან პერიშიჩის ტრანსფერის თაობაზე უფრო დიდხანს გრძელდება, ვიდრე მოსალოდნელი იყო.
როგორც იცით, ჟოზე მოურინიოსთვის ხორვატი გარემარბის დამატება ზაფხულის სატრანსფერო ფანჯრის ერთ-ერთი უმთავრესი მისია იყო და ამისთვის “წითელი ეშმაკების” ხელმძღვანელები ახლაც ყველაფერს აკეთებენ.
უცხოური წყაროები აქტიურად იწერებიან “წითელი ეშმაკების” ახალ შეთავაზებებზე. ბოლო ცნობების მიხედვით, ინგლისელები “ინტერს” 40 მილიონ ფუნტს სთავაზობენ, მაგრამ “ნერაძური” მაინც უარზეა.
ჯანლუკა დიმარციოს ისიც კი გაიგო,რომ “ოლდ ტრაფორდელები” მზად არიან ტრანსფერში ანტონი მარსიალის განათხოვრებაც ჩართონ, მაგრამ მილანური კლუბის პოზიცია მაინც უცვლელია.
სჭირდება “მანჩესტერ იუნაიტედს” ივან პერიშიჩი?
ფაქტია, რომ ჟოზე მოურინიოს განკარგულებაში მყოფ ფეხბურთელთა უმეტესობა ერთნაირად აზროვნებს: მნიშვნელობა არა აქვს, იქნება ეს ხუან მატა, მარსიალი, ჰენრიკ მხითარიანი, ჯესი ლინგარდი თუ მარკუს რეშფორდი, ბურთის მიღების შემთხვევაში ისინი მაშინვე ცენტრისკენ იწყებენ მოძრაობას. ეს “წითელი ეშმაკების” შეტევებს ადვილად პროგნოზირებადს ხდის.
“იუნაიტედს” კრეატიული ფეხბურთელი ესაჭიროება, რომელსაც ფლანგებიდან უყვარს შეტევა და ხშირ შემთხვევაში მოულოდნელ გადაწყვეტილებებსაც იღებს. 28 წლის ხორვატი ფეხბურთელი კი ზუსტად ასეთია, რამეთუ მას თავისუფლად შეუძლია რთული სიტუაციებიდან გამოძრომა.
დორტმუნდის “ბორუსიას” ყოფილი ფეხბურთელი შეტევისუნარიანობით ყოველთვის გამოირჩეოდა, ის ყოველთვის აიძულებს მცველს ფლანგისკენ იმოძრაოს და თანაგუნდელებს ამით დიდი სივრცე შეუქმნას. საკმაოდ შედეგიანია მისი ჩაწოდებები და ამ დროს ის თავს უფრო კომფორტულად გრძნობს, ვიდრე “იუნაიტედის” რომელიმე ამჟამინდელი ფეხბურთელი.
სტატისტიკისთვის გეტყვით, რომ ივან პერიშიჩმა გასულ სეზონში 239-ჯერ სცადა ჩაწოდება. მარსიალმა, მხითარიანმა და ლინგარდმა კი საერთო ჯამში 129-ჯერ.
ალბათ ძალიან კარგად მოგეხსენებათ, რომ ხორვატიის ეროვნული ნაკრების ერთ-ერთ ლიდერს ორივე ფეხით შეუძლია თამაში, თანაც თანაბრად კარგად, რაც მას დრიბლინგისას საკმაოდ დიდ უპირატესობას აძლევს.
შედეგად, ერთი-ერთზე ყოფნისას, პერიშიჩის მეტოქეს ძალიან უჭირს მისი შემდგომი სვლების პროგნოზირება, როგორც ამას ფოტოზე ვხედავთ.
ასეთ შემთხვევაში, ანტონი მარსიალი, რომელიც მარჯვენა ფეხით თამაშობს, ცენტრისკენ გადაწყვეტდა ბურთის წაღებას, წითელი ისრის მიმართულებით.
პერიშიჩი კი სხვაგვარად მოიქცა…
როდესაც საჯარიმოში მის წინააღმდეგ მეტოქე აღმოჩნდა, მან რამდენიმე ფინტი გამოიყენა მეტოქის დასაბნევად, რომ ვერ გამოეცნო, თუ რა მიმართულებით გააგრძელებდა სვლას, რაშიც მას ხელს მისი ტანის აგებულებაც უწყობს. მარჯვნივ თუ მარცხნივ? მეტოქე ვერაფერს ხვდება.
პერიშიჩმა თავისი არჩევანი გააკეთა, მეტოქემ კი ვერაფერი გააწყო – ხორვატი ფეხბურთელის გამჭოლ გადაცემას კი ედერი გამოეხმაურა, რომელმაც ერთი მარტივი შეხებით ბურთი “უდინეზეს” კარის ბადესი მოათავსა. ეს ერთ-ერთია იმ 8 საგოლე გადაცემიდან, რომელიც პერიშიჩმა სერია ა-ს გასულ სეზონში გააკეთა – “იუნაიტედში” კი ყველაზე მეტი საგოლე გადაცემა მარსიალისა და ერერას ანგარიშზეა (6-6).
ასეთი შესაძლებლობების ფონზე, გასაკვირი სულაც არაა, რომ პერიშიჩმა 2016/17 წლების სეზონის გათამაშებაში 61 საგოლე შანსი შექმნა იტალიის პირველ ჩემპიონატში, მეტი ვიდრე მოურინიოს რომელიმე ფეხბურთელმა – ამასთან ყველაზე ახლოს პოგბა იყო (57).
აღსანიშნავია ისიც, რომ პერიშიჩის მსგავსმა შესაძლებლობებმა სრულად უნდა შეავსოს “წითელ ეშმაკთა” ახალწვეული, რომელუ ლუკაკუ, რომელიც მსგავსს პასებს ასპროცენტიანი სიზუსტით იყენებს.
ყველაფერთან ერთად, პერიშიჩს მეტოქის საჯარიმოში ადგილის მოძებნის განსაკუთრებული უნარიც გააჩნია.
“კალიარისთან” გამართული მატჩის ამ მომენტში პერიშიჩმა მოედნის ხედვისა და ინტელექტის უმაღლესი დონე გამოავლინა – როგორც კი დაინახა, რომ მისი მეტოქე მისკენ იწყებდა მოძრაობას, ის საპირისპირო მიმართულებით გაიქცა და საკმაოდ მარტივად მოხვდა საჯარიმოში.
ედერის ბრწყინვალე გადაცემამ კი ის მეკარესთან მარტო დატოვა, ხორვატმაც არ დააღალატა თავისი თანაგუნდელი და ანგარიშიც გახსნა.
გასულ სეზონში პერიშიჩმა 11 გოლი გაიტანა, “იუნაიტედში” კი მასზე მეტი გოლის შეგდება მხოლოდ იბრაჰიმოვიჩმა შეძლო – 17. ხორვატმა 104-ჯერ დაარტყა კარის მიმართულებით, შვედმა 115-ჯერ.
პერიშიჩს საჯარიმოს გარედანაც უყვარს მოულოდნელი დარტყმების განხორციელება. მან გასულ სეზონში საჯარიმოს გარედან 24-ჯერ გაისროლა ბურთი, თუმცა ერთიც ვერ გაიტანა, რაც მის მინუსად შეიძლება ჩაითვალოს.
გავიხსენოთ “ტორინოსთან” ჩატარებული მატჩის ერთ-ერთი ეპიზოდი, როდესაც ივანს ოთხი თანაგუნდელი ეხსნებოდა, მან კი კარის მიმართულებით გადაწყვიტა დარტყმა. დარტყმა საშინელი აღმოჩნდა.
იგივე მოხდა “პალერმოსთან” მატჩშიც. ივანმა არც მაურო იკარდისა და არც სხვა თანაგუნდელების გარჯა არ დააფას და თავად გადაწყვიტა მომენტის დაგვირგვინება.
ყველამ ძალიან კარგად იცის, რომ ფული “წითელი ეშმაკებისთვის” პრობლემას არასდროს წარმოადგენდა, მაგრამ საკითხავი ისაა, მართლა სჭირდება თუ არა “მანჩესტერ იუნაიტედს” ივან პერიშიჩი…
