ალექსის სანჩესი “პარი სენ-ჟერმენის” ხელმძღვანელებს შეხვდა

ლონდონის “არსენალის” თავდამსხმელი ალექსის სანჩესი “პარი სენ-ჟერმენის” ხელმძღვანელებს შეხვდა.

შეხვედრა პარიზის ერთ-ერთ სასტუმროში შედგა და მას თავად ფეხბურთელი, მისი წარმომადგენლები, “პარი სენ-ჟერმენის” სპორტული დირექტორი ანტერო ენრიკე და კლუბის პრეზიდენტი ნახერ ალ ხელაიფი ესწრებოდნენ.

ფრანგული მხარე მზად არის, 28 წლის თავდამსხმელის სანაცვლოდ “არსენალს” 50 მილიონი ევრო გადაუხადოს. ცნობისთვის, ჩილელ ფეხბურთელს “მეთოფეებთან” კონტრაქტი 2018 წლის 30 ივნისს ეწურება.

ალექსის სანჩესმა რამდენიმე დღის წინ განაცხადა, რომ ჩემპიონთა ლიგაზე სურს თამაში, “არსენალმა” კი ინგლისის პრემიერლიგის გასულ გათამაშებაში მეხუთე ადგილი დაიკავა და ევროპის ყველაზე პრესტიჟული საკლუბო ტურნირის მიღმა დარჩა.