დღის მთავარი სატრანსფერო ამბები – 12 აგვისტო
ისკო “რეალთან” ახანგრძლივებს
მადრიდის “რეალის” ხელმძღვანელები მოხიბლულნი არიან ისკოს პროგრესით და ამის გამო, მის დაჯილდოვებას გეგმავენ.
As-ის მიერ გავრცელებულ ინფორმაციას თუ დავუჯერებთ, ისკო ძალიან ახლოსაა “რეალთან” 5-წლიანი კონტრაქტის გაფორმებასთან. მისი გამოსასყიდი თანხა კი 700 მილიონი ევრო იქნება.
ინტერესების ომი კოუტინიოსა და “ლივერპულს” შორის
Mirror საკმაოდ საინტერესო ცნობებს გვაწვდის, რომლის მიხედვითაც, მერსესაიდის “ლივერპულმა” კოუტინიოს მოთხოვნა ტრანსფერზე დაყენების საკითხთან დაკავშირებით, უარით გაისტუმრა.
როგორც იცით, “წითლების” ბრაზილიელი ლიდერის გადაბირებით კატალონიის “ბარსელონაა” დაინტერესებული.
“მანჩესტერ იუნაიტედმა” “რეალს” კონკრეტული თანხა დაუსახელა
“მანჩესტერ იუნაიტედის” ხელმძღვანელებმა “რეალის” უფროსებს საკმაოდ ნათლად აუხსნეს, რომ გარეტ ბეილის ტრანსფერში 90 მილიონ ფუნტზე მეტის გადახდას არ აპირებენ.
როგორც იცით, ლონდონის “ტოტენჰემის” ექს-ფეხბურთელში “რეალმა” თავის დროზე 86 მილიონი ფუნტი გადაიხადა. უელსელი ფეხბურთელის ტრანსფერს “ჩელსიც” განიხილავს.
“ტოტენჰემი”: ერიქსენი არ იყიდება
ესპანურ პრესაში “ბარსელონაში” ნეიმარის პოტენციურ შემცვლელად კრისტიან ერიქსენსაც ასახელებენ, რომელთანაც კავშირს მერსესაიდის “ლივერპულიც” ინარჩუნებს.
“მამლების” პრეზიდენტმა, დანიელ ლევიმ კი დასაწყისშივე მოსპო ყველანაირი შანსი და განაცხადა, რომ “ტოტენჰემს” მიმდინარე ზაფხულში აღარავინ დატოვებს.
ნ’ზონზის აგენტი: “სტივენს “სევილიადან” წასვლა უნდა”
სტივენ ნ’ზნონზის აგენტი აცხადებს, რომ ფრანგ საყრდენ ნახევარმცველს ანდალუსიური “სევილიას” დატოვება სურს.
“სიმართლე ისაა, რომ სტივენ ნ’ზონზის “სევილიადან” წავსლა უნდა. ამის შესახებ კლუბში ყველამ იცის. იმედი მაქვს, ანდალუსიელთა ხელმძღვანელობა სწორ არჩევანს გააკეთებს და ჩემს კლიენტს გაყიდის,” – აცხადებს აგენტი.
