დღის მთავარი სატრანსფერო ამბები – 26 აგვისტო
“ჩელსი” ლორენტესთვის იბრძვის
ლონდონის “ჩელსის” ხელმძღვანელები სატრანსფერო ფანჯრის დახურვამდე გუნდში კიდევ ერთი თავდამსხმელის დამატებას გეგმავენ. Daily Telegraph-ის ცნობით, საქმე ფერნანდო ლორენტეს ტრანსფერს ეხება.
როგორც ცნობილი ხდება, ანტონიო კონტე, რომელიც ლორენტესთან “იუვენტუსში” ყოფნის პერიოდშიც მუშაობდა, 15 მილიონს იხდის ესპანელი ფეხბურთელის სანაცვლოდ.
“ბარსელონას” კოუტინიოსა და დი მარიას ტრანსფერები სურს
დორტმუნდის “ბორუსიას” ახალგაზრდა ფრანგი შემტევის, უსმან დემბელეს ტრანსფერის განხორციელების შემდეგ, კატალონიელები ფილიპე კოუტინიოსა და ანხელ დი მარიას ტრანსფერებზე გადაერთვნენ.
Marca-ს მიერ გავრცელებული ინფორმაციის მიხედვით, “ბლაუგრანას” ხელმძღვანელები სატრანსფერო ფანჯრის დახურვამდე აპირებენ სამხრეთ ამერიკელი ფეხბურთელებისთვის ბრძოლას.
“მარსელი” ორიჯის ტრანსფერზე მუშაობს
ფრანგული “მარსელის” ხელმძღვანელები “ლივერპულის” ბელგიელი თავდამსხმელის, დივოკ ორიჯის ტრანსფერით არიან დაინტერესებულები. ამ ინფორმაციას Marseille Mercato-ც ადასტურებს.
წყაროს ცნობით, ორიჯი შიშობს, რომ არასაკმარისი სათამაშო პრაქტიკის გამო მსოფლიო ჩემპიონატზე თამაშს ვერ შეძლებს და მზადაა, 15 მილიონიანი შეთანხმების მთავარი გმირი გახდეს.
მბაპე და ფაბინიო “პსჟ”-ში გადავლენ
“პარი სენ-ჟერმენის” ხელმძღვანელები 2017 წლის ზაფხულის სატრანსფერო ფანჯარაზე კარის მოჯახუნებას გეგმავენ – ნეიმარის ტრანსფერის შემდეგ, ფრანგები “მონაკოდან” კილიან მბაპესა და ფაბინიოს წაყვანას გეგმავენ.
როგორც ცნობილი ხდება, ფაბინიოს ტრანსფერის ღირებულება 55 მილიონ ევროს შეადგენს, მბაპეს ფასი კი 150 მილიონ ევრომდე მიდის. ამ ტრანსფერები განხორციელების შემთხვევაში პარიზელთა ზაფხულის დანახარჯი 400 მილიონ ევროს გაცდება.
“ბაიერნსა” და “მანჩესტერ იუნაიტედს” გიორგი ჩაკვეტაძის შეძენა სურდათ
თბილისის “დინამოსა” და საქართველოს ახალგაზრდული ნაკრების ფეხბურთელის, გიორგი ჩაკვეტაძის მიმართ ინტერესს ევროპის 19-წლამდე ჩემპიონატის დასრულების შემდეგ არაერთი კლუბი იჩენდა. ბელგიური ვებ-გვერდი voetbalnieuws.be იუწყება, რომ მიუნხენის “ბაიერნმა” 17 წლის შემტევ ნახევარმცველში “დინამოს” 6 მილიონი ევრო შესთავაზა, თუმცა ეს მას შემდეგ მოხდა, რაც ჩაკვეტაძე “გენტთან” შეთანხმდა.
ახალგაზრდა მოთამაშე “გენტის” წევრი მაშინ გახდება, როცა მას 18 წელი შეუსრულდება, იქამდე კი ის თბილისელთა რიგებში ითამაშებს.
ბელგიური სააგენტოების ცნობით, ჩაკვეტაძის მიმართ ინტერესს “მანჩესტერ იუნაიტედი”, “ლევერკუზენი” და “ჰოფენჰაიმიც” იჩენდნენ.
